ԵՐԵՎԱՆ, 18 ապրիլի. /Նովոստի-Արմենիա/. 2019-20 ուսումնական տարվանից սկսած Երևան քաղաքի պետական հանրակրթական դպրոցներում առաջին դասարանցիների ընդունելությունը կատարվելու է էլեկտրոնային գրանցման եղանակով:
ՀՀ կրթության և գիտության նախարարության Կրթական տեխնոլոգիաների ազգային կենտրոնի կողմից կողմից մշակվել է առցանց համակարգ։
Ինչպես նշվում է Կրթության և գիտության նախարարության Facebook–ի էջում, համակարգը կգործարկվի 2019 թվականի մայիսի 15-ին ժամը 9:00-ին:
Առցանց հայտագրման համար անհրաժեշտ է մուտք գործել հայտագրման համակարգի էջ, ընտրել համայնքը և դպրոցը։
Հաջորդ քայլն ազատ տեղեր տեսնելիս «ավելացնել հայտ» կոճակը սեղմելն է։ Նախարարությունից նշում են, որ եթե կոճակն ակտիվ չէ, նշանակում է՝ տվյալ դպրոցում ազատ տեղեր չկան, հետևաբար պետք է ընտրել մեկ այլ դպրոց:
Համակարգում գրանցվելու հաջորդ քայլում անհրաժեշտ է մուտքագրել ծնողներից մեկի հանրային ծառայությունների, այսինքն` սոցիալական քարտի համարանիշը, ծնողի անունը, ազգանունը, գործող էլեկտրոնային փոստի հասցեն ու սեղմել «շարունակել» կոճակը:
Համակարգում կհայտնվի երեխայի սոցիալական քարտի համարանիշը մուտքագրելու համար անհրաժեշտ դաշտը։ Մուտքագրումից հետո համակարգը բնակչության պետական ռեգիստրից ավտոմատ կներբեռնի երեխայի անձնական մյուս տվյալները` անուն, ազգանուն, ծննդյան տարեթիվ և այլն։
Այնուհետև պետք է ստուգել տվյալները և սեղմել «շարունակել» կոճակը:
«Էկրանի վրա կհայտնվի հայտի հաստատումը հավաստող էջն ու Ձեր էլփոստին կուղարկվի ծածկագիր։ Ծածկագիրը տեղադրել վերևի պատուհանում, մուտք գործել Ձեզ համար ստեղծված էջ և տեսնել տեղեկատվություն` դպրոց ընդունվելու համար անհրաժեշտ փաստաթղթերի ցանկի և դրանք դպրոց ներկայացնելու ժամկետի մասին»,– նշվում է հաղորդագրության մեջ։
Հատուկ ընդգծվում է, որ սահմանված վերջնաժամկետում փաստաթղթերը դպրոց չներկայացնելու դեպքում հայտը կչեղարկվի։
Միաժամանակ, համակարգը հնարավարություն է տալիս սեփական ցանկությամբ չեղարկել հայտագրումը և ընտրել նոր դպրոց։ -0-
