ԵՐԵՎԱՆ, 29 մարտի. /Նովոստի–Արմենիա/. Հայաստանի ընտրական օրենսգրքի նոր նախագիծն ընտարտեղամասերում վեբ–տեսախցիկների տեղադրման և քվեարկության ընթացքի առցանց հեռարձակման հնարավորություն է ընձեռում, երեքշաբթի լրագրողներին ասաց Հայաստանի հանրապետական կուսակցության պատգամավոր Սուքիաս Ավետիսյանը։
«Իշխող կուսակցությունը դեմ չէ քվեարկության ընթացքի առցանց հեռարձակմանը, համարելով, որ դա կօգնի վստահություն ներշնչել ընտրական գործընթացներին և ցրել ընտրությունների թափանցիկության կասկածները»,– ասաց Ավետիսյանը։
Սակայն, պատգամավորի խոսքով, ընտրություններին հետևելու այս մեթոդը շատ ծախսատար է, և իշխանությունները պետք է վստահ լինեն, որ այն կարդարացնի իրեն, իսկ ընտրությունների արդյունքներից դժգոհների թիվը կպակասի։
Իր հերթին խորհրդարանի նախկին պատգամավոր Վիգեն Խաչատրյանը նշեց ընտրատարածքներում առցանց հեռարձակումների նպատակահարմարությունը։
«Այդ որոշումը ոչ մի կերպ չի խախտում քաղաքացիների իրավունքներն ու ազատությունները։ Հակառակը, ընտրողները կարող են վստահ լինել, որ ընտրությունների արդյունքները չեն կեղծվի»,– ասաց նա։
Խաչատրյանը նշեց նաև, որ ամենամեծ խախտումները գրանցվում են քվեարկածների` հասարակությունից թաքնվող ցուցակների հետ շահարկումների դեպքում։
«Ընտրությունների ժամանակ իրավախախտումները նվազագույնի հասցնելու համար, նախևառաջ, պետք է բացել հենց այդ ցուցակների նկատմամբ հասանելիությունը։ Ոչ ոք չի հավատում, որ դրանց գաղտնիությունը պայմանավորված է քաղաքացիների իրավունքների պաշտպանության անհրաժեշտությամբ»,– ասաց նա։
Ընտրական նոր օրենսգրքի քննարկումները մեկնարկել են Հայաստանում մարտի 18–ից։ Դրա ընդունման անհրաժեշտությունը պայմանավորված է Սահմանադրության բարեփոխմամբ և խորհրդարանական իշխանավարման անցնելով։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
