Հայաստանի վարչապետը կոչ է արել ֆինանսների նախարարին չշփոթել տրիլիոնները միլիարդների հետ

ԵՐԵՎԱՆ, 1 դեկտեմբերի. /Նովոստի–Արմենիա/. Հայաստանի վարչապետ Կարեն Կարապետյանը հինգշաբթի կառավարության նիստում կոչ է արել ֆինանսների նախարար Վարդան Արամյանին չշփոթել տրիլիոնները միլիարդների հետ։

Ներկայացնելով 2017 թվականի պետբյուջեի նախագծի լրացումները` Արամյանը նշեց, որ բյուջեի համախառն եկամուտները մնացել են 1 մլրդ 210 մլն դրամի մակարդակում, դրանցից հարկերը` 1 մլրդ 135 մլն։ Ծախսերը կկազմեն 1 մլրդ 360 մլն, պակասուրդը` 150.1 մլրդ դրամ։

«Դուք, կարծես թե, ողջ գիշեր աշխատել եք, պարոն Արամյան։ Շփոթում եք տրիլիոնները միլիարդների հետ, իսկ միլիարդները` միլիոնների»,– ասել է Կարապետյանը։

«Անկեղծ ասած` գիշերը ժամը երեքին ենք տուն գնացել»,– պատասխանել է նախարարը։

Ավելի վաղ հաղորդվել էր, որ բյուջեի համախառն եկամուտները մնացել են 1 տրլն 210 մլրդ դրամի մակարդակում (շուրջ $2,5 մլրդ), դրանցից հարկերը` 1 տրլն 135 մլրդ (շուրջ $2,3 մլրդ)։ Ծախսերը կկազմեն 1 տրլն 360 մլրդ (շուրջ $2,8 մլրդ), պակասուրդը` 150 մլրդ դրամ (շուրջ $312 մլն)։ -0-