ԵՐԵՎԱՆ, 12 փետրվարի./Նովոստի–Արմենիա/. ՀՀ վարչապետ Նիկոլ Փաշինյանը երեքշաբթի ելույթ է ունեցել խորհրդարանում և խոսել անձնական թիկնազորի ուժեղացման պատճառների մասին։
ՀՀ ԱԺ–ն երեքշաբթի քննարկում է կառավարության հնգամյա գործունեության ծրագիրը։
Փաշինյանը նշեց, որ պետական համակարգն ազդեցության շատ լուրջ լծակ է, որին դժվար է հակազդել, ինչի համար անհրաժեշտ են լրացուցիչ միջոցներ։
«Մենք կարողացանք ազդել պաշտոնյաների վարքագծի վրա, օրինակ, վարչապետի ավտոշարասյունը կրճատվեց և կանգնում է լուսացույցի կարմիր լույսի տակ։ Սրանք չնչին փոփոխություններ են, սակայն դրանք տեղի ունեցան։ Բացի այդ, վարչապետին այցելող բոլոր մարդիկ պարտավոր են անցնել խիստ ստուգում մուտք գործելիս։ Շատերը կապում են դա անվտանգության հետ, սակայն ես ուզում եմ ազնվորեն խոստովանել, որ սա միակ միջոցն է կանխելու նվերների հոսքը վարչապետի կաբինետ։ Այլ ելք չկա», – ասաց ՀՀ վարչապետ Նիկոլ Փաշինյանը։
Նա տեղեկացրեց, որ նրան սկզբում նվիրում էին գրքեր, ավելի ուշ սկսեցին նվիրել ոսկերչական զարդեր` կուլոններ, խաչեր, ականջօղեր և այլ զարդեր։
Փաշինյանը խոստովանեց, որ չի ցանկանում նեղացնել նվերներ մատուցողներին` հրաժարվելով դրանցից, քանի որ նվերներ մատուցողներից շատերը ոչ միայն պոտենցիալ ներդրողներ են, այլև կարևոր անձինք։ Այդ կապակցությամբ վարչապետը նշեց, որ վարչապետի կաբինետի այցելության կարգը ենթադրում է լուրջ վերահսկողություն` որպես նվերների հոսքը դադարեցնելու միակ միջոց։
Վարչապետը նաև դժգոհեց աշխատակազմի աշխատանքից` ընդգծելով, որ ավելի վաղ միշտ ինքն էր գրում իր ելույթների տեքստերը, սակայն հիմա երբեմն ստիպված է օգտվել իր աշխատակիցների ծառայություններից, ովքեր «երևի կորցրել են կապն իրականության հետ»։
Նա նշեց, որ հաճախ նրան տրամադրում են տեքստեր, որոնք նա հասցնում է կարդալ կամ միջոցառումից կես ժամ առաջ, կամ միջոցառման ճանապարհին։
«Հաճախ այդ տեքստերից ինձ հետ խոսում է Սերժ Սարգսյանը (նախկին նախագահը)։ Այնպիսի տպավորություն է, որ տեքստի հեղինակները տեղյակ չեն երկրում տեղի ունեցած փոփոխություններից, և դա, ցավոք, այսօր մեր օբյեկտիվ իրականությունն է», – հայտարարեց Փաշինյանը։–0–
