Երևանի բնակիչները կարող են անվճար չափել զարկերակային ճնշումը (ՎԻԴԵՈ)
15:50
25 Հունիսի 2019
ԵՐԵՎԱՆ, 25 հունիսի. /Նովոստի–Արմենիա/. Երևանի բնակիչները Երևանի քաղաքապետարանի, «Ասինո ֆարմ» և «Տակեդա» ընկերությունների օժանդակությամբ և Հայաստանի բժշկական ասոցիացիայի և Հայ սրտաբանների ասոցիացիայի կազմակերպած ակցիայի շրջանակում կարող են անվճար չափել զարկերակային ճնշումը քաղաքի կենտրոնում գործող հատուկ կետերում։
Ակցիան կանցկացվի երկու շաբաթվա ընթացքում մետրոյի «Երիտասարդական» և «Հանրապետության Հրապարակ» կայարաններում, Արամի և Սարյանի փողոցների խաչմերուկի այգում (Միսակ Մանուշյանի պուրակ), «Մոսկվա» կինոթատրոնի մոտ և Հյուսիսային պողոտայում։
Կլինիկական օրդինատոր Նելլի Հովհաննիսյանը պատմեց, որ ակցիայի գլխավոր նպատակը Հայաստանի բնակիչների զարկերակային բարձր ճնշման բացահայտումն ու կանխարգելումն է, ինչպես նաև ճնշման հետ խնդիրներ ունեցող մարդկանց հետագա հետազոտության ուղեգրելը։
«Սա գլոբալ հետազոտություն է, որի նպատակն է ախտորոշել և տոկոսային հարաբերակցությամբ որոշել այն ցուցանիշները, թե որքան տարածված են զարկերակային խնդիրները Հայաստանի շրջանների բնակիչների մոտ, ինչպես նաև կանխարգելում իրականացնել»,– նշեց նա։
Հովհաննիսյանի խոսքով, նախորդ տարվա ակցիայի ընթացքում բացահայտվել է մարդկանց մեծ տոկոս, ովքեր չեն իմացել իրենց բարձր զարկերակային ճնշման մասին, ինչպես նաև նրանք, ովքեր ոչ արդյունավետ դեղորայք են ընդունել։
Նա նշեց, որ ռիսկի խմբում են 50 տարեկանից բարձր տղամարդիկ, դաշտանադադարի մեջ գտնվող, հորմոնալ խանգարումներ, շաքարային դիաբետ ունեցող կանայք։ Ռիսկի խմբում են նաև նրանք, ովքեր ալկոհոլ են օգտագործում, ծխում են, ֆիզիկական ցածր ակտիվություն ունեն, սխալ են սնվում և անառողջ կենսակերպ են վարում։
Զարկերակային ճնշման հետ խնդիրների կանխարգելման համար անհրաժեշտ է, նախևառաջ, փոխել կյանքի ոճը, ինչը ներառում է հրաժարում ծխելուց, ֆիզիկական ակտիվության բարձրացում, սննդակարգի կարգավորում, աղի և ալկոհոլի սահմանափակում։
Հովհաննիսյանը նշեց, որ եթե այդ շտկումներից հետո ճնշումը չկարգավորվի, ապա պետք է անցնել դեղորայքային բուժման։ -0-
