Չորեքշաբթի` հուլիսի 10–ի առավել ուշագրավ նորությունները

ԵՐԵՎԱՆ, 11 հուլիսի. /Նովոստի–Արմենիա/. «Նովոստի–Արմենիա» գործակալությունը ներկայացնում է չորեքշաբթի` հուլիսի 10–ի առավել ուշագրավ նորությունների իր տարբերակը

• Չորեքշաբթի ցերեկը Երևանում և Հայաստանի մի շարք մարզերում էլեկտրամատակարարման խափանումներ են գրանցվել։ Անջատվել են Երևանի ՋԷԿ–ը և Հրազդանի ՋԷԿ–ի 5–րդ էներգաբլոկը։ Մայրաքաղաքի բազմաթիվ վարչական շրջաններում տեղի են ունեցել լարման տատանումներ, խախտվել է ջրամատակարարումը, չեն աշխատել վճարային տերմինալները, բարդացել է ճանապարհային երթևեկությունը։ Ժամանակավորապես դադարեցվել է երևանյան մետրոպոլիտենի աշխատանքը։

Երեկոյան էներգետիկ համակարգում բոլոր խափանումները վերացվել են։

• Հուլիսի 10-ին, ժամը 10:04-ին «911» ծառայությանն ահազանգ է ստացվել, որ Երևան քաղաքի Ավան վարչական շրջանի Նարեկացի թաղամասի թիվ 42 շենքից աղջիկ երեխա է ընկել (մոտ 13 տարեկան), անհրաժեշտ է շտապօգնություն:

ԱԻՆ Փրկարար ծառայության հաղորդմամբ, պարզվել է, որ շենքի մոտակայքում հայտնաբերվել է մոտ 20 տարեկան իգական սեռի քաղաքացու դի:

Ինչպես հաղորդում է shamshyan.com–ը, ըստ նախնական տեղեկությունների՝ աղջիկը, որը կլինի 20-25 տարեկան, իրեն ցած է նետել 14 հարկանի շենքի 10-րդ հարկից։ Դատաբժշկի եզրակացության համաձայն, դիակի վրա բռնության հետքեր չեն հայտնաբերվել։

• «ԳեոՊրոՄայնինգ» հանքարդյունաբերական ընկերությունների միջազգային դիվերսիֆիկացված խումբը Հայաստանի Հանրապետության կառավարությանը կոչ է անում իրավասու մարմինների մասնակցությամբ կազմել բազմակողմ հանձնաժողով «Ագարակի պղնձա-մոլիբդենային կոմբինատ»-ում ստեղծված իրավիճակի հանգուցալուծման նպատակով։ Այս մասին հայտնում է «ԳեոՊրոՄայնինգ» ընկերության մամուլի ծառայությունը։ 

Հիշեցնենք, որ հուլիսի 3-ից Տեխնոլոգիական տրանսպորտի աշխատակիցները չեն ներկայացել աշխատանքի, ինչի հետևանքով Կոմբինատի աշխատանքը դադարել է՝ կաթվածահար անելով արտադրական գործընթացը։ Կոմբինատի աշխատակիցները, աշխատանքային պայմանագրի խախտումով, առաջադրում են լրացուցիչ դրամական միջոցներ վճարելու պահանջ, ինչը երկկողմանի պայմանագրերով նախատեսված չէ։ Արտադրության դադարի հետևանքով կոմբինատը, տեղական համայնքային և ՀՀ պետական բյուջեն զգալի նյութական վնասներ կկրեն։ 

• Երևանում կբացվի «Marriott Courtyard» հյուրանոցը։Այդ մասին Հայաստանի նախագահ Արմեն Սարգսյանի հետ հանդիպմանը հայտնել են «Marriott International» կառավարիչ խորհրդի համանախագահներ Ռայներ Սակաուն և Պենկաշ Բռլաինը, ինչպես նաև նրանց հայ գործընկերները, «Գալաքսի» ընկերության խմբի ղեկավարները։

• Հայաստանի Սահմանադրական դատարանը մասնակիորեն վարույթ է ընդունել առաջին ատյանի դատարանի դատավոր Դավիթ Գրիգորյանի դիմումը Հայաստանի նախկին նախագահ Ռոբերտ Քոչարյանի գործով։ -0-