Բաբլոյանը` Սասուն Միքայելյանի հայտարարության մասին. Արցախի հարցում չպետք է լինեն սևեր և սպիտակներ

ԵՐԵՎԱՆ, 28 նոյեմբերի./Նովոստի–Արմենիա/. Ազգային ժողովի խոսնակ Արա Բաբլոյանը չկարողացավ անտարբեր մնալ արտահերթ ընտրությունների արշավում տեղ գտած իրադարձությունների նկատմամբ։ Այդ մասին հայտնում է խորհրդարանի մամուլի ծառայությունը։

Սասուն Միքայելյանը Թալինում նախընտրական արշավի իր խոսքում ասել է, որ Հայաստանում թավշյա հեղափոխության հաղթանակն ավելի կարևոր է, քան Արցախյան ազատագրական պատերազմը։ 

 «Հայաստանի Հանրապետության շուրջ 30-ամյա պատմությունն ապացուցել է, որ կան արժեքներ, որոնք ենթակա չեն որեւէ շահարկման, չարաշահման, սակարկությունների, ինչպես նաեւ այդ արժեքները չեն կարող իջեցվել անձնական կամ քաղաքական նախընտրական շահերի մակարդակ: Այդ արժեքներում իր ուրույն տեղն ունի Արցախը»,– ասվում է Բաբլոյանի հայտարարությունում։

Նա հիշեցրեց, որ ընդամենը երկու տարի առաջ՝ ապրիլին, հայ ժողովուրդը կրկին փաստեց ու համոզվեց, որ Արցախի անվտանգությունն ու արցախաբնակ մեր հայրենակիցների ինքնորոշման իրավունքը գտնվում են բոլորի հոգածության ներքո:

«Արցախի հարցում մեզանում գոյություն չպետք է ունենան սեւեր, կարմիրներ, սպիտակներ կամ կանաչներ: Քաղաքական գույների բաժանումները, եթե չենք կարողանում հրաժարվել դրանցից, տարածենք բացառապես քաղաքական պայքարի վրա, իսկ Արցախն ու Հայաստանի Հանրապետությունն ունեն ընդամենը մեկ միասնական գույն, եւ դա հայկական եռագույնն է: Ընդ որում, ասվածը հավասարապես վերաբերվում է բոլոր քաղաքական ուժերին»,– ասվում է ԱԺ խոսնակի հայտարարության մեջ։

Նրա խոսքով, եռագույնն ընդհանուր է, ինչպես ընդհանուր է Արցախի և Հայաստանի Հանրապետության անվտանգությունը և Արցախի ու Հայաստանի Հանրապետության ապագան: Բաբլոյանը կոչ արեց Արցախի հարցով համախմբվել մեկ միասնական դիրքորոշման շուրջ՝ ջենթլմենական պայմանավորվածությամբ Արցախի թեման կամ Արցախ անվանումն ընդհանրապես հանել նախընտրական ելույթների եւ բանավեճերի առօրյա բառամթերքից:
Նա նաև դիմեց արցախցիներին։

«Խնդրում եմ նախընտրական այս օրերին զերծ մնալ կրքեր բորբոքելուց եւ անարձագանք թողնել հնչեցվող որոշ հայտարարություններ, որոնք, ամենայն հավանականությամբ, մտքերի ոչ ճիշտ ձեւակերպումների հետեւանք են: Ինչպես արդեն նշեցի, Արցախի եւ Հայաստանի Հանրապետության անվտանգությունը եւ բարեկեցիկ ապագան բոլորիս միասնական նպատակն է»,- ասված է Արա Բաբլոյանի հայտարարության մեջ: -0-