ԵՐԵՎԱՆ, 1 մարտի./Նովոստի–Արմենիա/. ՀՀ վարչապետ Նիկոլ Փաշինյանը երկուշաբթի հանրահավաքի ժամանակ հայտարարեց, որ 2015թ.–ի Սահմանադրությունը, որն ուժի մեջ է մտել 2018թ.–ին, այդ ընթացքում բացահայտել է բազմաթիվ թերություններ։
«Այսօր մենք տեսնում ենք, որ այդ Սահմանադրությունը, ցավոք, ստեղծում է բազմաթիվ ճգնաժամային հնարավորություններ և ռիսկեր։ Դա, ի վերջո, պետք է ընդունել», – ասաց նա։
Վարչապետը նշեց, որ եկել է ժամանակը փաստելու, «որ մենք պետք է աշխատենք, որպեսզի այս տարվա հոկտեմբերին համաժողովրդական հանրաքվեով ընդունենք նոր Սահմանադրություն կամ սահմանադրական փոփոխություններ»։
«Ի վերջո, կառավարման կիսանախագահական ձևին անցնելը պետք է դառնա հնարավոր տարբերակներից մեկը։ Եվ այդ գործընթացը մենք պետք է իրականացնենք` սերտորեն համագործակցելով խորհրդարանի, կառավարության, նախագահի, քաղաքական ուժերի, հասարակական շրջանակների հետ», – ասաց նա։
Փաշինյանի խոսքով, իսկ մինչ այդ Սահմանադրության մեջ կան հոդվածներ, որոնց փոփոխությունը չի նախատեսում համաժողովրդական հանրաքվե, և դրանք կարելի է փոխել խորհրդարանում` քվեարկության միջոցով։
«Առաջիկա ամիսներին մենք պետք է նույն ձևաչափերով` կառավարություն, ԱԺ, նախագահ, քաղաքական ուժեր, աշխատենք` այն հոդվածները բարելավելու համար, որոնք հնարավոր է բարելավել խորհրդատվությունների և խորհրդարանում քվեարկությունների միջոցով։ Դա աշխատանք է, որը պետք է կատարել», – ասաց նա։
Վարչապետը հայտարարեց, որ այս թեմաները բազմաթիվ անգամ բարձրացվել են քաղաքացիական հասարակության, քաղաքական ուժերի կողմից, խորհրդարանում անցել են քննարկումներ, նախագահը ևս խոսել է այս թեմաներով։
«Մեր կարևորագույն խնդիրը պետք է դառնա ստեղծել և ձևավորել այնպիսի սահմանադրական կառույցներ, որոնք երաշխավորում են Հայաստանի անվտանգությունն ու բացառում են նման ճգնաժամերի ձևավորումը», – ասաց Փաշինյանը։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում