Փաշինյանը մեկնաբանել է Մեդվեդևի ռեպլիկը, որը մեծ աղմուկ է հանել սոցցանցերում (ՎԻԴԵՈ)

ԵՐԵՎԱՆ, 2 մայիսի./Նովոստի–Արմենիա/. ՀՀ վարչապետ Նիկոլ Փաշինյանը մեկնաբանել է ՌԴ վարչապետ Դմիտրի Մեդվեդևի ռեպլիկը Երևանում կայացած ԵՏՄ միջկառավարական խորհրդի նիստի ժամանակ, որը դարձել է սոցցանցերում օգտատերերի բուռն քննարկումների պատճառ։

Ապրիլի 30–ին նիստի ժամանակ, երբ Փաշինյանն առաջարկեց մասնակիցներին «перейти ..» («անցնել», ի նկատի ունենալով «ընդունված փաստաթղթերի ստորագրման ընթացակարգին», խմբգրի), Մեդվեդևն անսպասելիորեն ընդհատեց ՀՀ վարչապետին և ժպիտով նշեց. «Нет! Перейти куда?» («Ոչ, ու՞ր անցնել»)։

«Նոր մի պահ մտնում եմ ֆեյսբուք ու աչքերիս չեմ հավատում, որ կոռուպցիոն համակարգի մնացորդները այսքան հեշտությամբ կարող են փոթորիկ առաջացնել սոցիալական ցանցերում։ ԵԱՏՄ միջկառավարական խորհրդի նիստին ոչ միայն ՌԴ վարչապետ Դմիտրի Մեդվեդեւը, այլեւ մենք բոլորս հույս ունեինք, որ րոպե առաջ перейдем սուրճի սենյակ, որովհետեւ բոլորս ահավոր հոգնել էինք ու սուրճ էինք ուզում։ Աշխատանքները նախատեսվածից երկուսուկես ժամ ավել տեւեցին։

Իսկ նախորդ օրվա մեր շփումը բոլոր հիմքերը տվել էր ոչ աշխատանքային հատվածին անհամբեր սպասելու։ Էս ամենը պիտի ասվի՞, չեմ հասկանում», – գրել է ՀՀ վարչապետը Facebook–յան իր էջում։–0–