Մարուքյանն ու «Սերժ Սարգսյանի կոստյումը». ԱԺ–ում քննարկում են կառավարության կառուցվածքը (ՎԻԴԵՈ)

ԵՐԵՎԱՆ, 17 ապրիլի./Նովոստի–Արմենիա/. «Լուսավոր Հայաստան» խմբակցության ղեկավար Էդմոն Մարուքյանն այսօր ԱԺ–ում ելույթ ունենալիս խոսել է պետական կառուցվածքի մասին։

«Հայտնի է, որ այս պետական կառավարման կառուցվածքն անվանվել է «Սերժ Սարգսյանի կոստյում»։ Դա հայտնի փաստ է։ Այսինքն Սերժ Սարգսյանի կոստյումն ա, սուպերվարչապետական համակարգ ա։ Հիմա դուք բերել եք նախագիծ, որով առաջարկում եք անել հետևյալ բանը` կոստյումի 2 կոճակները հանում եք ու ասում` այ էս կոստյումը հագեք, այն արդեն լավ կոստյում է», – ասաց Մարուքյանը` հանելով հագի կոստյումն ու ցուցադրելով։

Նրա խոսքով, կարված «կոստյումը» չի փոխվել, և այդ սուպերվարչապետական համակարգը մնացել է ուժի մեջ։

«Ինչու՞ վարչապետի խոստումը չեք կատարել այս նախագծում։ Իսկ վարչապետն այս ամբիոնից ասել է, որ մենք գտնում ենք, որ ԱԱԾ–ն և ոստիկանությունը դառնալու են նախարարություններ, հետևաբար մտնելու են կառավարության կառուցվածք։ Հիմա «Լուսավոր Հայաստան» խմբակցությունն առաջարկություն է ներկայացրել, որ մենք ունենանք Ազգային անվտանգության նախարարություն, Աշխատանքի և սոցիալական հարցերի նախարարություն, Առողջապահոթյան նախարարություն, Արտաքին գործերի նախարարություն, Գյուղատնտեսության նախարարություն, Ենթակառուցվածքների և տարածքային զարգացման նախարարություն, Իրավական հարցերի նախարարություն, Կրթության, գիտության և սպորտի նախարարություն, պահպանում ենք Մշակույթի նախարարությունը, Ներքին գործերի նախարարություն, որտեղ միավորվում է ԱԻՆ–ը, Շրջակա միջավայրի պաշտպանության նախարարություն, Պաշտպանության նախարարություն, Տնտեսական զարգացման նախարարություն և Ֆինանսների նախարարություն, որտեղ ներառված է ՊԵԿ–ը», – նշել է Մարուքյանը։–0–