ԵՐԵՎԱՆ, 29 սեպտեմբերի./Նովոստի–Արմենիա/. The Economic Times հնդկական թերթը
հաղորդում է, որ Հնդկաստանը պատրաստվում է Հայաստանին մատակարարել զենքի խոշոր խմբաքանակ։
«Հնդկաստանը ստորագրել է դեպի Հայաստան հրթիռների, ռեակտիվ արկերի և ռազմամթերքի արտահանման խոշոր պատվեր, քանի որ Հյաստանը ներգրավված է երկարաժամկետ սահմանային հակամարտության մեջ հարևան Ադրբեջանի հետ», – գրում է հրատարակությունը` նշելով, որ համաձայնությունը ձեռք է բերվել երկու երկրների կառավարությունների մակարդակում։
Պայմանագրերի արժեքը չի հրապարակվում, բայց, հրատարակության տվյալներով, առաջիկա ամիսներին Հայաստան կմատակարարվի ավելի քան 20մլրդ ռուպիի հնդկական զենք (ավելի քան 250մլն դոլար)։
The Economic Times–ի աղբյուրները հայտնել են, որ պատվերով նախատեսվում է պատմության մեջ առաջին անգամ արտահանել Pinaka տեղական ռեակտիվ կայանքներ, որոնք արդեն գտնվում են հնդկական բանակի սպառազինության մեջ, ինչպես նաև հակատանկային հրթիռներ և ռազմամթերք։
«Սա Հայաստան սպառազինության համակարգերի արտահանման առաջին դեպքը չէ։ 2020թ.–ին Հնդկաստանը մատակարարել է մոտ 3,5մլրդ ռուպիի (շուրջ 44մլն դոլար) Swathi չորս ռադար», – գրում է հրատարակությունը։–0–
