ԵՐԵՎԱՆ, 20 մայիսի. /Նովոստի–Արմենիա/. Երևանում ՀՀ վարչապետ Նիկոլ Փաշինյանը կողմնակիցները դատարաններն արգելափակելու ակցիայի շրջանակում արգելափակել են Սահմանադրական դատարանի շենքի մուտքն ու ելքը։
Նախօրեին ՀՀ վարչապետը գրառում է կատարել Facebook–յան իր էջում` կոչ անելով վաղը արգելափակել հանրապետության՝ առանց բացառության բոլոր դատարանների ելքերն ու մուտքերը։ «Վաղը ժամը 12.00-ին կհայտարարեմ Հայկական հեղափոխության՝ երկրորդ, ամենակարևոր փուլի մեկնարկը: Ակնկալում եմ համաժողովրդական աջակցություն: Առավոտյան ժամը 08.30-ից արգելափակում ենք հանրապետության՝ առանց բացառության բոլոր դատարանների ելքերն ու մուտքերը, այնպես, որ ոչ ոք ներս չմտնի: Ժամը 12.00-ին իմ ելույթը հեռարձակվում է ուղիղ եթերում», – գրել է ՀՀ վարչապետը։
Ակտիվիստները նշում են, որ ժամը 07։30–ից գտնվում են շենքի մոտ և կանխել են աշխատակիցների մի քանի փորձ, ովքեր ցանկացել են մտնել շենք ու սկսել աշխատանքը։
«Դա վարչապետի հանձնարարականն է, ցտեսություն», – ասել է ցուցարարը դատարանի աշխատակիցներից մեկին։
ՀՀ երկրորդ նախագահ Ռոբերտ Քոչարյանի գործով աղմկահարույց դատական գործընթացը մայիսի 18–ին նոր թափ ստացավ դատավոր Դավիթ Գրիգորյանի ընդունած որոշումից հետո։
Մայիսի 18–ին, Գրիգորյանը, քննելով Քոչարյանի նկատմամբ ընտրված խափանման միջոցի հիմնավոր լինելու հարցը, որոշեց կալանքից ազատ արձակել Քոչարյանին` Արցախի ներկա և նախկին նախագահներ Բակո Սահակյանի ու Արկադի Ղուկասյանի անձնական երաշխավորությամբ։ ԶԼՄ–ների տվյալներով, Սահակյանն ու Ղուկասյանը որպես գրավ վճարել են 500 հազարական դրամ (ավելի քան 1000 դոլար)։–0–