«Ամոթի պատնեշ» և տասնյակ բերման ենթարկվածներ Երևանում. դիպուկահարները կառավարության շենքի տանիքին են (ՖՈՏՈ, ՎԻԴԵՈ)
14:04
23 Փետրվարի 2021
ԵՐԵՎԱՆ, 23 փետրվարի./Նովոստի–Արմենիա/. Ոստիկանները շղթայված են պահում ՀՀ կառավարության երրորդ մասնաշենքը, որտեղ հիմա գտնվում է ՀՀ վարչապետ Նիկոլ Փաշինյանը։
Շենքն առավոտից շղթայված է, քանի որ նախօրեին ընդդիմությունը հայտարարեց, որ մտադիր է այնտեղ բողոքի ակցիա կազմակերպել` ՀՀ վարչապետ Նիկոլ Փաշինյանի հրաժարականի պահանջով։ Շենքի տանիքում երևում են դիպուկահարներ։
Մինչև ակցիայի մեկնարկը ոստիկանները շղթայեցին շենքի տարածքը` խոչընդոտելով լրագրողների և ակցիայի մասնակիցների տեղաշարժը։ Երբ Փաշինյանը մտավ շենք «Նիկոլ դավաճան», «Առանց Նիկոլ Հայաստան» վանկարկումների ներքո, ոստիկանությունը շարունակեց շղթայված պահել շենքը, ավելի ուշ ակցիայի մասնակիցները բերման ենթարկվեցին։
Իրավապահները խոչընդոտում էին նաև լրագրողների աշխատանքին, նրանց թույլ չեն տալիս մոտենալ կառավարության շենքին։ Լրագրողները հնարավորություն չունեցան հարցեր տալ վարչապետին կամ նրան ուղեկցող պաշտոնյաներին։
Ակցիայի ընթացքում տեղի ունեցան բախումներ, իրավիճակը լարված էր։ Նախնական տվյալներով, տասնյակ մարդիկ բերման են ենթարկվել։
Փորձեցին կոպտորեն բերման ենթարկել ՀՅԴ ԳՄ ներկայացուցիչ Իշխան Սաղաթելյանին, ինչի հետևանքով նա վնասվածք ստացավ, քթից արյուն էր հոսում։ Սաղաթելյանը հայտարարեց, որ վիրավոր չէ, պարզապես քերծվածք է։ Ոստիկաններին չհաջողվեց նրան բերման ենթարկել։
«Որևէ վնասվածք չեմ ստացել, պարզապես գլուխս եմ հարվածել», – ասաց նա։
Նրա կուսակից, «Yerkir Media» հեռուստաալիքի տեղեկատվական-վերլուծական ծառայության տնօրեն Գեղամ Մանուկյանը հայտարարեց, որ իր համար կառավարության շենքի շղթայումը «ամոթի պատնեշ է» ինչպես ոստիկանների, այնպես էլ Փաշինյանի համար։
«Սա ամոթի պատնեշ է այս ոստիկանների համար, քանի որ նրանք ծառայում են ոչ թե օրենքին, այլ մեկ մարդու», – հայտարարեց նա։–0–