ԵՐԵՎԱՆ, 14 մարտի. /Նովոստի-Արմենիա/. Ոստիկանությունը բերման է ենթարկել Օպերայի թատրոնի մոտ սրճարանների ապամոնտաժման դեմ հանդես եկող 16 մասնակիցների, այդ մասին «Նովոստի-Արմենիա»-ի հետ զրույցում հայտնեց ոստիկանության մամուլի քարտուղար Էդգար Ջանոյանը:
Ի՞նչ է տեղի ունեցել
Նախօրեին Օպերայի սրճարանների հարակից տարածքում իրավիճակը առավոտից լարվել էր։ Ընթանում էին սրճարանների ապամոնտաժման աշխատանքներ, ինչն առաջացրել էր դրանց սեփականատերերի դժգոհությունը:
Մոտ մեկ ամիս առաջ Երևանի քաղաքապետարանը հայտնել էր Օպերայի ազգային ակադեմիական թատրոնին հարող սրճարանները և ռեստորանները վերացնելու և այդ տարածքում կանաչ գոտին վերականգնելու մասին։
Մասնավորապես, Օպերային թատրոնի հարևանությամբ Ազատության հրապարակին հարող հողատարածքներ վարձակալած տնտեսվարող սուբյեկտներն իրազեկում են ստացել քաղաքապետարանի համապատասխան դեպարտամենտից։
«Ներկա պահին իրավապահ մարմինների ներկայացուցիչների օրինական պահանջները չկատարելու հիման վրա բերման է ենթարկվել 16 մարդ` Վարչական իրավախախտումների վերաբերյալ ՀՀ օրենսգրքի 182-րդ հոդվածի համաձայն», - ասաց Ջանոյանը:
Ի՞նչ է ասել թաղապետը
«Երևանի ղեկավարությունն ունի բոլոր իրավունքները ապամոնտաժելու այն բոլոր սրճարանները, որոնք գտնվում են Ա. Սպենդիարյանի անվան Օպերայի և բալետի թատրոնի շենքին կից», - հինգշաբթի լրագրողների հետ զրույցում հայտարարեց Կենտրոն համայնքի ղեկավար Վիկտոր Մնացականյանը:
Դեպքի վայր ժամանած Մնացականյանը հայտնեց, որ ապամոնտաժման են ենթակա միայն այն սրճարանները, որոնք գտնվում են անմիջապես Օպերայի շենքի մոտ, ինչի մասին հայտնի է դարձել ավելի վաղ:
«Տտնտեսվարող սուբյեկտների հետ ստորագրված պայմանագրերում գոյություն ունի կետ, ըստ որի, մենք կարող ենք տեղեկացնել իրենց նշված տարածքն ազատելու անհրաժեշտության մասին մեկ ամիս առաջ: Մենք կարող ենք լսել տնտեսվարող սուբյեկտների բոլոր ներկայացուցիչներին, սակայն նրանք պետք է հիշեն, որ այդ տարածքն այգի է, հանգստյան վայր: Ի վերջո, այն գտնվում է Օպերայի և բալետի թատրոնի շենքի մոտ», - ասաց Մնացականյանը:
Հարցին, թե ինչու նախօրեին քաղաքապետարանում կայացած քաղաքապետարանի աշխատակիցների և տնտեսվարող սուբյեկտների ներկայացուցիչների հետ հանդիպմանը չի մասնակցել քաղաքապետ Հայկ Մարությանը, Մնացականյանը հայտարարեց, որ քաղաքապետը գտնվել է Վրաստանի նախագահ Սալոմե Զուրաբիշվիլիի այցի կապակցությամբ պաշտոնական ընդունելությանը:
«Մենք ներկայացրել ենք քաղաքապետին բողոքողների բոլոր առաջարկությունները և պահանջները, և հասկացել ենք, որ չենք կարող ընդունել բոլորը: Այդ բոլոր օբյեկտները ստացել են գերշահույթ` անկախ նրանից աշխատել 5 տարի թե 5 օր, այնպես որ նրանք ապահոված են», - ասաց նա:
Նա նշեց, որ քաղաքապետարանը մտադիր է պահպանել Օպերայի շուրջ տարածքը որպես հանգստյան և զբոսանքի վայր:-0-
