Ոստիկանները փորձել են բերման ենթարկել Զարուհի Փոստանջյանին (ՏԵՍԱՆՅՈՒԹ)

ԵՐԵՎԱՆ, 14 մայիսի./Նովոստի–Արմենիա/. Ոստիկանները կիրակի փորձել են բերման ենթարկել «Երկիր Ծիրանիի» առաջնորդ, Երևանի քաղաքապետի թեկնածու Զարուհի Փոստանջյանին։

Փոստանջյանը ոստիկաններին տեղեկացրել է, որ գործող քաղաքապետ, ՀՀԿ ներկայացուցիչ Տարոն Մարգարյանի նախընտրական շտաբում ընտրակաշառք է բաժանվում։

Գտնվելով ընտրատեղամասերից մեկի տարածքում` Փոստանջյանը փորձել է բացել սեղանի դարակը, որտեղ դրված են ընտրողների ցուցակները։

Սակայն նախընտրական շտաբի նախագահը թույլ չի տվել` հայտարարելով, որ նա լիազորված չէ վերցնել իր անձնական սեղանի իրերը։

Ինչպես հաղորդում է «Նովոստի–Արմենիա» գործակալության թղթակիցը դեպքի վայրից, դեպքի վայր ժամանած ոստիկանները քննչական գործողություններ են սկսել, սակայն Փոստանջյանը խոչընդոտել է ոստիկանության գործողություններին։ Նոր Նորք համայնքի ոստիկանապետը հայտարարել է, որ շտաբում գտնվող բոլոր անձինք պետք է դուրս գան` քննչական գործողություններին չխոչընդոտելու համար։



Փոստանջյանը լեզվակռիվ է սկսել ոստիկանների հետ, ինչից հետո իրավապահ մարմինների աշխատակիցները փորձել են Փոստանջյանին բերման ենթարկել։ Նրանք քարշ տալով շտաբից հանել են Փոստանջյանին, սակայն չեն կարողացնել մեքենա նստեցնել։ Իրավապահները ձեռնպահ են մնացել ուժ կիրառել Փոստանջյանի նկատմամբ։

Երբ կողմնակի անձինք դուրս են եկել շտաբից, ոստիկանությունը սկսել է խախտումների վերաբերյալ ահազանգի ստուգումը։

Մայիսի 14–ին անցկացվում են Երևանի ավագանու ընտրությունները։ Քվեարկությունը կտևի մինչև երեկոյան 20:00: Երևանի ավագանու ընտրություններին մասնակցում են Հայաստանի հանրապետական կուսակցությունը, «Ելք» ընդդիմադիր դաշինքը և «Երկիր ծիրանի» ընդդիմադիր կուսակցությունը:

Ավագանու ընտրություններում ՀՀԿ–ի համամասնական ցուցակը գլխավորում է Երևանի գործող քաղաքապետ Տարոն Մարգարյանը։ «Ելք» դաշինքի ցուցակը գլխավորում է ԱԺ պատգամավոր Նիկոլ Փաշինյանը, իսկ «Երկիր Ծիրանին»` նրա հիմնադիր Զարուհի Փոստանջյանը։

«Երևան քաղաքի տեղական ինքնակառավարման մասին» օրենքի համաձայն, Երևանի քաղաքապետին ընտրում է Ավագանու խորհուրդը, որը ձևավորվում է կուսակցական սկզբունքով` համաքաղաքային ընտրությունների հիման վրա, որոնք անցկացվում են քվեարկության համամասնական համակարգով։

Ըստ օրենսդրության, եթե ընտրությունների արդյունքում խորհրդում կուսակցություններից մեկը ստանում է 50%–ից ավել տեղեր, ապա այդ կուսակցության ցուցակը գլխավորող թեկնածուն համարվում է ընտրված քաղաքապետ։ Եթե թեկնածուն չի համապատասխանում քաղաքապետին առաջադրվող պահանջներին, հրաժարվում է քաղաքապետի պաշտոնից կամ կուսակցություններից ոչ մեկը չի ստանում 50%–ից ավել, ապա քաղաքապետն ընտրվում է Ավագանու խորհրդի անդամների գաղտնի քվեարկության միջոցով։ Երևանի Ավագանու խորհուրդն ընտրվում է չորս տարի ժամկետով և բաղկացած է 65 անդամից։

Ներկա խորհրդում ներառված է երեք խմբակցություն` ՀՀԿ–ն, ԲՀԿ–ն և «Բարև, Երևան» ընդդիմադիր խմբակցությունը։ Երևանի գործող քաղաքապետ Տարոն Մարգարյանը զբաղեցնում է իր պաշտոնը 2011 թ.–ից։ –0–