ԵՐԵՎԱՆ, 25 հունիսի./Նովոստի–Արմենիա/. Հարուցված քրեական գործի շրջանակում ոստիկանության 6–րդ վարչությունն այս րոպեներին խուզարկություններ է իրականացնում մի շարք հասցեներում, որոնք կապված են «Security Dream» և «Еllips GA» ընկերությունների հետ։
Այս մասին «Նովոստի–Արմենիա» գործակալությանը հայտնեց ՀՀ ՔԿ նախագահի խորհրդական Սոնա Տռուզյանը։
«Ստուգումներ իրականացվում են երկու ընկերությունների գրասենյակներում, ինչպես նաև ընկերության հետ կապ ունեցող մասնավոր անձանց տներում», – ասաց Տռուզյանը։
Загружается новость ... "Лево"
Ավելի վաղ հայտնի էր դարձել , որ ոստիկանության կազմակերպված հանցավորության դեմ պայքարի գլխավոր վարչության Կոռուպցիայի և տնտեսական հանցագործությունների հակազդման վարչությունում տեղեկություններ էին ստացվել, որ «Security dream» ՍՊԸ–ի տնօրինությունը չարաշահումներ է թույլ տվել։ Նախապատրաստված նյութերով պարզվել է, որ 2011, 2013 և 2017 թթ.–ին Ճանապարհային ոստիկանության և «Security dream»–ի միջև պետության կարիքների համար երթևեկության նկատմամբ վերահսկողության համակարգեր գնելու և ծառայություններ մատուցելու վերաբերյալ պայմանագրեր են կնքվել։
Ընկերությունը ստեղծել է արագության վերահսկման մշտադիտարկման համակարգ, որի գործարկման արդյունքում պետության գանձած գումարները ՃՈ–ի և «Security dream»–ի միջև բաշխվել են 30/70, 50/50 և 10/90 տոկոսային հարաբերակցությամբ։
Բացի այդ 2017 թ.–ի փետրվարին կնքված պայմանագրով ՃՈ–ն գանձած գումարների 10 տոկոսը մատուցվող ծառայությունների համար հատկացրել է «Security dream» ընկերությանը։ Նույն պայմանագրով ՃՈ–ն պարտավորվել է նաև ընկերությանն ամբողջությամբ հատուցել մատուցված ծառայությունների ծախսերը։
Ըստ «Security dream»–ի ներկայացրած հաշվետվությունների, նախնական տվյալներով պարզվել է նաև, որ ստեղծված համակարգերի սպասարկում իրականացնելու համար «Security dream»–ը պայմանագիր է կնքել «Ellips GA» ՍՊԸ–ի հետ դրամական միջոցներ հափշտակելու դիտավորությամբ։ Մասնավորապես, նախորդ տարի կնքված պայմանագրով 2017 թ.–ի փետրվարից 2018 թ.–ի հունիս կազմվել են փաստացի չմատուցված ծառայությունների վերաբերյալ կեղծ կատարողական ակտեր, որոնց հիման վրա կազմված կեղծ հաշվետվությունները ներկայացվել են ՃՈ։ Արդյունքում, «Security dream» և «Ellips GA» ընկերությունների տնօրինությունը հափշտակել է շուրջ 1․015․869․600 դրամ։–0–
