ԵՐԵՎԱՆ, 22 դեկտեմբերի. /Նովոստի–Արմենիա/. Ղարաբաղա–ադրբեջանական շփման գծում հարաբերական անդորր է, երեքշաբթի լրագրողներին ասաց ՀՀ ՊՆ մամուլի քարտուղար Արծրուն Հովհաննիսյանը։
Նրա խոսքով, ԼՂՀ ՊԲ տեղեկատվության համաձայն, այս գիշեր իրավիճակը շփման գծում համեմատաբար հանգիստ էր։
«Գիշերվա ընթացքում գրանցվել են շատ քիչ խախտումներ` ընդամենը մեկ–երկու տասնյակ, ինչն առօրյա գործ է, և մենք հուսով ենք, որ այս իրավիճակը կպահպանվի», – ասաց Հովհաննիսյանը։
Նա նշեց, որ շփման գծում լարվածությունը սովորաբար պայմանավորված է լինում տարբեր քաղաքական, ներքաղաքական և արտաքին պատճառներով, ինչից հետո գրանցվում է հարաբերական անդորր։
Հովհաննիսյանն ավելացրեց, որ ՊՆ–ի լիազորությունների մեջ չի մտնում լարվածության ավելացման պատճառների հրապարակումը, սակայն, փորձագետների գնահատմամբ, վերջին շրջանում գրանցված լարվածության աճի պատճառը Սարգսյան–Ալիև հանդիպումն էր։
Այլ պատճառների թվում նա նշեց Ադրբեջանում տիրող ներքաղաքական իրավիճակը։
Ինչ վերաբերում է հայ–ադրբեջանական սահմանին, ապա, Հովհաննիսյանի խոսքով, վերջին շրջանում այնտեղ գրեթե չեն գրանցվել գնդակոծություններ ոչ ռազմական դիրքերի, ոչ էլ գյուղերի ուղղությամբ։
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ.–ի դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Հանրաքվեին հաջորդեցին Ադրբեջանի ձեռնարկած ռազմական լայնածավալ գործողությունները, որոնց հետևանքով Ադրբեջանը կորցրեց վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ.–ի մայիսի 12-ին զինադադարի վերաբերյալ եռակողմ համաձայնագիր կնքելուց հետո հակամարտության գոտում դադարեցին ռազմական գործողությունները, որոնց հետևանքով երկու կողմն, ընդհանուր առմամբ, շուրջ 25-30 հազար զոհ ունեցավ, իսկ մոտ մեկ միլիոն մարդ էլ ստիպված լքեց բնօրրանը: Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է:
1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակում, որի համանախագահներն են ԱՄՆ-ն, Ռուսաստանը և Ֆրանսիան:-0-
