ԵՐԵՎԱՆ, 18 փետրվարի. /Նովոստի–Արմենիա/. Կադրային ջարդ ՀՀ առողջապահության նախարարությունում չի լինի, պարզապես ծրագրային օպտիմալացում է սպասվում, հինգշաբթի լրագրողներին հայտնեց ՀՀ առողջապահության նախարար Արմեն Մուրադյանը:
Ինչպես հայտնել էին լրատվամիջոցները, ՀՀ վարչապետ Հովիկ Աբրահամյանը դժգոհ է ՀՀ առողջապահության նախարար Արմեն Մուրադյանի աշխատանքից և հայտարարել է, որ մտադիր է գերատեսչությունում կառուցվածքային լուրջ փոփոխություններ իրականացնել:
ԱՆ–ն առաջիկայում կառուցվածքային լուրջ փոփոխությունների կենթարկվի>>
Ինչպես նշեց նախարարը, նախօրեին կառավարությունում ներկայացվել է նախարարության անցած տարվա գործունեության հաշվետվությունը, որը բավարար է գնահատվել:
«Որոշակի խնդիրներ և առաջարկություններ եղել են , որոնք աշխատանքային ձևաչափում լուծել հարցեր են: Առավել ևս, այս պահին քննարկվում է ինստիտուտցիոնալ սկզբունքների վրա հիմնված համակարգի օպտիմալացման հարցը` համաձայն առաջիկա տարիների առողջապահության ոլորտի ռազմավարության»,-ասաց Մուրադյանը:
Նա նշեց, որ ռազմավարության համաձայն, գերատեսչության առաջնահերթությունների և կարիքների վերաբերյալ առաջարկություններ են մշակվել:
Պետպատվերի շրջանակում բուժման մասին խոսելիս, նախարարը նշեց, որ այս ոլորտում տարիների կուտակված խնդիրներ կան, որոնք վերլուծվել և խմբավորվել են , որից հետո կսկսվի ֆինանսական մեխանիզմների մշակումը:
Միաժամանակ, նա նշեց, որ 2014 թվականին պետպատվերի շրջանակում բուժօգնություն է տրամադրվել 329 հազար դեպքում, իսկ 2015 թվականին ` 326 հազար:
«Պետությունն իր վրա մեծ բեռ է վերցրել և բնականաբար, դրանց իրականացման ճանապարհին կարող են որոշակի խնդիրներ առաջանալ: Ցանկացած երկրում, անկախ ֆինանսական մեխանիզմներից, սոցիալական լարվածություններ են լինում, քանի որ առողջապահության հարցերը եզակի դեպքերում են դրական էմոցիաներ առաջացնում, բացառությամբ` ծննդաբերության և պլաստիկ վիրահատությունների»,-ասաց Մուրադյանը: -0-
