ԵՐԵՎԱՆ, 18 դեկտեմբերի. /Նովոստի–Արմենիա/. Հայկական կողմը Սարգսյան–Ալիև հանդիպման շրջանակում հանդես կգա որպես խաղաղության արտահանող, հայտարարեց քաղաքական տեսաբան Կոնստանտին Պետրոսովը։
Հայաստանի և Ադրբեջանի նախագահներ Սերժ Սարգսյանի և Իլհամ Ալիևի հանդիպումը տեղի կունենա դեկտեմբերի 19–ին Բեռնում` ԵԱՀԿ ՄԽ–ի միջնորդությամբ։
«Բեռնում կայանալիք հանդիպման սպասումները կարելի է ձևակերպել որպես շփման գծում այսօր գոյություն ունեցող լարվածության աստիճանի նվազման փորձ։ Երևանն այս դեպքում հանդես է գալիս որպես խաղաղության արտահանող, և դա հասկանալի է», – ասաց Պետրոսովը ուրբաթ «Նովոստի–Արմենիա» միջազգային լրատվության գործակալության Փորձագիտական ակումբի առաջին նիստի ժամանակ։
ԱՄԻ «Նովոստի–Արմենիայի» Փորձագիտական ակումբի առաջին նիստի լուսանկարները կարելի է դիտել այստեղ>>
Նրա խոսքով` այլ հարց է, թե որ դիրքից է հանդես գալու պաշտոնական Բաքուն, որտեղ վերջերս կան շատ լուրջ ներքին խնդիրներ։ «Դեռևս անհասկանալի է, թե ադրբեջանական կողմն ինչ օրակարգով է ներկայանալու հանդիպմանը», – ընդգծեց Պետրոսովը։
Փորձագետը միաժամանակ կոչ արեց հայկական ԶԼՄ–ներին հղում չանել ադրբեջանական աղբյուրների վրա, չտարածել ապատեղեկատվություն, այլ փորձել ձևավորել սեփական տեղեկատվական օրակարգը, ինչը շատ կարևոր է հատկապես նորությունների տրամադրման տեսակետից։
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։ 1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։ 1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում։–0–
