Վիեննայում նախատեսված Սարգսյան–Ալիև հանդիպումը չի նշանակում, որ բանակցությունները վերսկսվում են. փորձագետ

ԵՐԵՎԱՆ, 16 մայիսի. /Նովոստի–Արմենիա/. Վիեննայում նախատեսված Հայաստանի և Ադրբեջանի նախագահներ Սերժ Սարգսյանի ու Իլհամ Ալիևի հանդիպումը, որը նախաձեռնել են ԵԱՀԿ ՄԽ համանախագահները, չի նշանակում, որ բանակցային գործընթացը վերսկսվում է, երկուշաբթի լրագրողներին հայտարարեց քաղաքագետ Հրանտ Մելիք–Շահնազարյանը։

Քաղաքագետի կարծիքով` ՀՀ նախագահն Ավստրիայի մայրաքաղաքում նախատեսված հանդիպումների ընթացքում ուշադրությունը կենտրոնացնելու է Արցախի անվտանգության երաշխիքների ապահովման անհրաժեշտության վրա։

Հայաստանի և Ադրբեջանի նախագահները կհանդիպեն երկուշաբթի. Մոգերինի>>

«Համանախագահները կփորձեն ստեղծել մթնոլորտ, որն անհրաժեշտ է բանակցային գործընթացի վերսկսման համար, սակայն ինչպես հայտարարում են միջնորդները, Վիեննայում նախատեսված հանդիպումներն ընդամենը խորհրդակցություններ են», – ասաց Մելիք–Շահնազարյանն ու ավելացրեց, որ Ադրբեջանը փորձում է հանդիպումները ներկայացնել որպես բանակցությունների վերսկսում` պնդելով, թե հայկական կողմի պայմանները չեն բավարարվել։

Փորձագետը կարծում է, որ Հայաստանի և Ադրբեջանի նախագահների հնարավոր հանդիպումը պաշտոնական Երևանի ներկայացրած պայմանների շրջանակում է։

Ղարաբաղյան իրավիճակի սրումը կարող է հանգեցնել պատերազմի Հայաստանի և Ադրբեջանի միջև. Շտայնմայեր>>

Մելիք–Շահնազարյանի խոսքով` Վիեննայում նախատեսված հանդիպումը հիանալի հնարավորություն է Երևանի համար ներկայացնելու միջնորդներին սեփական հստակ դիրքորոշումը։

Ապրիլի 2–ից 5–ն ադրբեջանական ԶՈՒ–ն ղարաբաղա–ադրբեջանական շփման գծի հարավային, հարավարևելյան և հյուսիսարևելյան ուղղություններով ձեռնարկել է բացահայտ հարձակվողական գործողություններ` հրետանիով, զրահապատ տրանսպորտային միջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները` հասցնելով մեծ վնասներ։

Ավստրիայի մայրաքաղաքում, ԵԱՀԿ Մինսկի խմբի համանախագահների նախաձեռնությամբ, Սերժ Սարգսյանը կանցակացնի մի շարք աշխատանքային հանդիպումներ:

ՄԽ-ի համանախագահները նախորդ շաբաթ հայտարարեցին Ավստրիայի մայրաքաղաքում Հայաստանի և Ադրբեջանի նախագահների հանդիպումը կազմակերպելու մտադրության մասին: ՌԴ ԱԳՆ-ի պաշտոնական ներկայացուցիչ Զախարովան հայտնել է, որ այդ հանդիպմանը մտադիր է մասնակցել նաև ՌԴ ԱԳ նախարար Սերգեյ Լավրովը:

Վիեննայում մայիսի 16-17–ը կգտնվի նաև ԱՄՆ պետքարտուղար Ջոն Քերին` Լիբիայի կարգավորման հարցով նախարարական խորհրդակցությանը և Սիրիայի օժանդակության միջազգային խմբի նիստին մասնակցելու նպատակով։ Ինչպես ավելի վաղ հայտնել էր Պետդեպարտամենտի մամուլի ծառայության ղեկավար Ջոն Քիրբին, Ռուսաստանի և Ֆրանսիայի հետ ԱՄՆ–ն հանդես կգա որպես Լեռնային Ղարաբաղի հակամարտության կարգավորման հարցով Հայաստանի և Ադրբեջանի նախագահների հանդիպման կազմակերպիչ։ --0--