Փորձագետ. Ադրբեջանն է պատասխանատու Հայաստանի հետ սահմանին իրականացված դիվերսիայի համար

ԵՐԵՎԱՆ, 29 դեկտեմբերի. /Նովոստի–Արմենիա/. Այս անգամ Ադրբեջանը չի կարող ստել, որ հայկական կողմն առաջինն է խախտել հրադադարի ռեժիմը կամ դիվերսիայի փորձ է կատարել, Facebook-յան իր էջում գրել է քաղաքագետ Հրանտ Մելիք-Շահնազարյանը:

«Ադրբեջանական քարոզչամեքենան լռում է դեռ Տավուշի դեպքերի մասին։ Հրահանգ չունեն։ Իրենց ձախողված օպերացիայի փաստացի ապացույցներ են թողել մեզ մոտ», - նշել է Մելիք-Շահնազարյանը։

Հակառակորդի դիվերսիոն փորձի հետևանքով հայկական կողմը ունի երեք զոհ. հայտնի են նրանց անունները>>

«Կարծում եմ՝ սա ևս մեկ հարմար պահ է, որ վերջապես ստիպենք Մինսկի խմբի համանախագահներին հասցեական մեղադրանքներ հնչեցնել և բաց տեքստով ասել, որ հենց Ադրբեջանն է ամեն ինչ անում բանակցային գործընթացը տապալելու ու մշտական լարվածություն պահելու համար», - ավելացրել է փորձագետը։

Ինչպես հաղորդում է ՀՀ ՊՆ մամուլի ծառայությունը, դեկտեմբերի 29-ի վաղ առավոտյան ՀՀ Տավուշի մարզի՝ Չինարի գյուղից դեպի հարավ-արևելք ընկած պետական սահմանի հատվածում, ադրբեջանական զորքերը ձեռնարկել են դիվերսիոն ներթափանցման փորձ: ՀՀ զինված ուժերի ստորաբաժանումները չեզոքացրել են ադրբեջանական զորքերի նախահարձակ գործողությունները, հակառակորդը հետ է շպրտվել` տալով զոհեր ու վիրավորներ, այդ թվում նաև` հայկական մարտական դիրքերի հատվածում: Մարտական գործողությունների ժամանակ հայկական կողմը տվել է 3 զոհ: -0-