ԵՐԵՎԱՆ, 28 հուլիսի. /Նովոստի–Արմենիա/. «Սասնա ծռեր» խմբավորման անդամ, ոտքերից հրազենային վիրավորում ստացած Պավել Մանուկյանը ցանկանում է մասնակցել իր նկատմամբ խափանման միջոց ընտրելու միջնորդության քննարկմանը:
«Ես չեմ պատկերացնում, իր ծանր վիճակից ելնելով ոնց է գալու, երկու ոտքերից ունի ծանր հրազենային վնասվածքներ, եւ երկաթներով ոտքերը հավաքված են»,- «Էրեբունի» բժշկական կենտրոնում Մանուկյանին տեսակցելուց հետո հայտարարել է պաշտպան Ինեսա Պետրոսյանը, հաղորդում է a1plus–ը։
Պավել Մանուկյանի որդին՝ 22-ամյա Արամ Մանուկյանը, սակայն, հրաժարվել է մասնակցել խափանման միջոցի միջնորդության քննարկմանը:
Դեռ պարզ չէ, թե երբ կներկայացվի միջնորդություն Պավել Մանուկյանի մասով: Երբ կալանքի որոշումը լինի, նոր միայն անձին քաղաքացիական հիվանդանոցից կարող են տեղափոխել «Դատապարտյալների հիվանդանոց»:
«Կարող են տեղափոխել միայն այն դեպքում, երբ նրանց առողջական վիճակը ներում է և կարող են շարունակական բուժումը ապահովել», – նշել է պաշտպանը։
Պավել Մանուկյանին տեսակցած պաշտպան Ինեսա Պետրոսյանը նաև նշել է, որ Պավելի հոգեվիճակը շատ մարտական է:
«Նա ասաց, որ իմ ժողովրդին փոխանցեք, որ ես նույն հոգեվիճակում եմ, կպայքարեմ և կմեռնեմ ժողովրդիս ոտքերի տակ», - նշել է Ինեսա Պետրոսյանը:
Հուլիսի 26–ի լույս 27–ի գիշերը ՀՀ ոստիկանության տեղեկատվության և հասարակայնության հետ կապերի վարչության ղեկավար Աշոտ Ահարոնյանը Facebook–յան էջում հայտնել է, որ ՊՊԾ գնդի տարածքում իրավապահներին են հանձնվել զինված խմբի անդամներ Գագիկ Եղիազարյանն ու Արամ Հակոբյանը։
Նրա խոսքով` տեղի է ունեցել փոխհրաձգություն, ինչի հետևանքով վիրավորվել է իրավապահներից մեկը, ինչպես և Պավել Մանուկյանն ու նրա որդի Արամը: Երեքն էլ անմիջապես տեղափոխվել են հիվանդանոց:
Ընդդիմադիր Ժիրայր Սեֆիլյանի զինված կողմնակիցները հուլիսի 17–ին մուտք են գործել ՊՊԾ գնդի տարածք։ Ներխուժման ժամանակ զոհվել է գնդապետ Արթուր Վանոյանը։ Մարմնական վնասվածքներով հիվանդանոց է տեղափոխվել վեց մարդ` հինգ ոստիկան և զինված խմբի անդամներից մեկը։ –0–