ԵՐԵՎԱՆ, 2 հունվարի./Նովոստի–Արմենիա/. 2018 թվականի հունվարի 1-ից մինչև դեկտեմբերի 25-ը Հայաստանից մեկնածների և Հայաստան ժամանածների տարբերությունը կազմել է +20 հազար 713։ Այս մասին Facebook–յան իր էջում գրել է ՀՀ վարչապետի պաշտոնակատար Նիկոլ Փաշինյանը։
«Այսինքն Հայաստան ժամանածների թիվը 20 հազար 713-ով շատ է եղել մեկնածների թվից: Նախորդ տարվա ցուցանիշը - 25 հազար 932 է եղել: Այսինքն, 2017-ին մեկնածների թիվը 25 հազար 932-ով ավելի է եղել ժամանածների թվից: Փորձագետները կանխատեսում էին, որ այս տարին կփակենք + 10 հազարով: Փաստորեն ժամանումները կանխատեսվածից կրկնակի ավել են: Դուխով», – գրել է Փաշինյանը։
Ազգային վիճակագրական կոմիտեի տվյալներով, Հայաստանի մշտական բնակչության թիվը, 2011 թ.–ի մարդահամարի հիման վրա, 2018 թ.–ի հոկտեմբերի 1–ի դրությամբ կազմել է 2 969,2 հազար մարդ։ Հայաստանի բնակչության թիվը 2018 թ.–ի հոկտեմբերի 1–ի դրությամբ, 2017 թ.–ի նույն ժամանակահատվածի համեմատ, նվազել է 10,4 հազար մարդով։ Միաժամանակ, տարեսկզբի համեմատ հանրապետության բնակչության թիվը նվազել է 3,5 հազարով։–0–