ԵՐԵՎԱՆ, 12 նոյեմբերի. /Նովոստի–Արմենիա/. Երևանի քաղաքապետ Հայկ Մարությանի որոշմամբ, Նոր Նորքի Գյուրջյան 1/3 հասցեում ապամոնտաժվում է ավելի քան 1100քմ ապօրինի կառույց։
Այս մասին Facebook–յան իր էջում գրել է Երևանի քաղաքապետի մամուլի քարտուղար Հակոբ Կարապետյանը` հրապարակելով տեսանյութ։
« Ոստիկանները ապահովում են անցորդների անվտանգությունը»,– նշել է Կարապետյանը` մեկնաբանելով տեսանյութը։
Նոյեմբերի 9–ին Հայկ Մարությանը Երևանի քաղաքապետարանի Քաղաքաշինության և հողի վերահսկողության վարչության նորանշանակ պետ Ռոբերտ Դարբինյանին ներկայացնելիս հայտարարել է, որ ոչ ոք չի կարող զանգել իրեն և ապօրինի շինարարության համար թույլտվություն ուզել։
«Եթե ապօրինի շինարարություն է և փաստաթուղթ չունի, միանգամից պետք է դադարեցվի՝ առանց բանակցությունների, խնդրանքների կամ ծանոթությունների: Ով էլ ձեզ ասի՝ ես կզանգեմ, կասեմ քաղաքապետին կամ գլխավոր ճարտարապետին, չկա՛ այդպիսի բան, այդպիսի մարդ գոյություն չունի, թե Հայաստանում, թե Հայաստանից դուրս, որ կզանգահարի ինձ և կասի՝ այս ապօրինի շինարարությունը թող լինի: Ես ձեզ վստահեցնում եմ: Ով այդպիսի բան ասի, իմացեք, որ ստում է: Ուզում եմ, որ դուք դրանով լինեք ուժեղ, լինեք վստահ, որ ձեր թիկունքում ոչ մի գործ չի արվելու, պայմանավորվածություններ ձեռք չեն բերվելու ապօրինի շինարարություն իրականացնողների հետ: Մենք ձեր մեջքին կանգնած ենք, գնացեք առաջ»,- ասել է քաղաքապետը` միաժամանակ տեղեկացնելով, որ ոլորտն այսուհետև ամբողջովին համակարգելու է Երևանի գլխավոր ճարտարապետ Արթուր Մեսչյանը։–0–