ԵՐԵՎԱՆ, 11 մայիսի. /Նովոստի–Արմենիա/. «Եվրատեսիլ 2016» երգի միջազգային մրցույթում Հայաստանը ներկայացնող Իվետա Մուկուչյանը հայտարարել է, որ ծածանել է Արցախի դրոշը, քանի որ խաղաղություն է ուզում։
Իվետա Մուկուչյանը ծածանեց Արցախի դրոշը «Եվրատեսիլ» մրցույթի ժամանակ>>
«Ես ապրում եմ Գերմանիայում և ազգությամբ հայ եմ։ Միայն խաղաղություն եմ ցանկանում: Ցանկանում եմ, որպեսզի տարածվեն սիրո ալիքները, հենց այդ պատճառով ծածանել եմ դրոշը, քանի որ ուզում եմ, որպեսզի մարդիկ կենտրոնանան դրա վրա։ Ուզում եմ, որպեսզի աշխարհում խաղաղություն տիրի», – հայտարարել է նա` պատասխանելով շվեդ լրագրողի հարցին առաջին կիսաեզրափակչից հետո կազմակերպված ասուլիսի ժամանակ։
Մուկուչյանի այս քայլն առաջացրել է ադրբեջանցի լրագրողի վրդովմունքը։ Դրան ի պատասխան` Ադրբեջանը ներկայացնող երգչուհի Սամրան նշել է, որ ««Եվրատեսիլը» երգի մրցույթ է, և այն երաժշտության մասին է»։
Հայաստանը «Եվրատեսիլ 2016»–ի եզրափակչում է>>
Հայաստանի հետ եզրափակիչ դուրս եկան Ադրբեջանի, Ռուսաստանի, Նիդեռլանդների, Հունգարիայի, Խորվաթիայի, Ավստրիայի, Չեխիայի, Կիպրոսի և Մալթայի ներկայացուցիչները։
Մայիսի 12–ին կայանալիք երկրորդ կիսաեզրափակչում ելույթ կունենան Լատվիայի, Բելառուսի, Իռլանդիայի, Շվեյցարիայի, Մակեդոնիայի, Ավստրալիայի, Լիտվայի, Լեհաստանի, Իսրայելի, Սերբիայի, Ալբանիայի, Բուլղարիայի, Դանիայի, Վրաստանի, Ռումինիայի, Սլովենիայի, Նորվեգիայի, Ուկրաինայի, Բելգիայի ներկայացուցիչները:
«Եվրատեսիլ 2016»–ի եզրափակիչը տեղի կունենա մայիսի 14–ին։
Յուրաքանչյուր կիսաեզրափակչից եզրափակիչ դուրս կգա 10–ական մասնակից։ «Եվրատեսիլի» հիմնադիր երկրները` Իսպանիան, Ֆրանսիան, Գերմանիան, Իտալիան և Բրիտանիան, ինչպես նաև հյուրընկալ երկիրը` Շվեդիան ավտոմատ կերպով անցնում են եզրափակիչ։
Ապրիլի 2–ից 5–ն ադրբեջանական ԶՈՒ–ն ղարաբաղաադրբեջանական շփման գծի հարավային, հարավարևելյան և հյուսիսարևելյան ուղղություններով ձեռնարկել է բացահայտ հարձակողական գործողություններ` հրետանիով, զրահապատ տրանսպորտային միջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները` հասցնելով մեծ վնասներ։-0-
