ԵՐԵՎԱՆ, 19 դեկտեմբերի./Նովոստի–Արմենիա/. «Իմ քայլը» դաշինքը ՀՀ առաջին փոխվարչապետի պաշտոնակատար Արարատ Միրզոյանի թեկնածությունն առաջադրել է ԱԺ խոսնակի պաշտոնում։
Այս մասին լրագրողներին ասաց դաշինքի ներկայացուցիչ, պատգամավոր Ալեն Սիմոնյանը ՀՀ վարչապետի պաշտոնակատար, դաշինքի առաջնորդ Նիկոլ Փաշինյանի մասնակցությամբ կայացած խորհրդակցությունից հետո։
Նրա խոսքով, երկու փոխխոսնակների պաշտոնում (երրորդը պետք է լինի ընդդիմության ներկայացուցիչ) դաշինքն առաջարկել է իր և Լենա Նազարյանի թեկնածությունները։ «Իմ քայլը» խմբակցության ղեկավար կդառնա մշակույթի նախարարի պաշտոնակատար Լիլիթ Մակունցը։
«Այս բոլոր թեկնածություններն առաջարկվել և ընդունվել են», – ասաց Սիմոնյանն` ավելացնելով, որ քննարկվել է նաև կառավարության կազմը, իսկ նորընտիր խորհրդարանի առաջին նիստի օրը կորոշի Կենտրոնական ընտրական հանձնաժողովը։–0–
