ԵՐԵՎԱՆ, 11 ապրիլի./Նովոստի–Արմենիա/. Հայաստանը պարտավոր է ԵՏՄ–ի գագաթնաժողովին ներկայացնել սեփական դիրքորոշումը ղարաբաղյան իրավիճակի շուրջ, կարծում է ՀՀԿ պատգամավոր Արտակ Դավթյանը։
Ավելի վաղ ռուսական ԶԼՄ–ները տեղեկացրել էին, որ ԵՏՄ վարչապետերի գագաթնաժողովը, որը պետք է տեղի ունենար Երևանում ապրիլի 8–ին, չեղյալ է հայտարարվել ղազախական կողմի նախաձեռնությամբ, քանի որ այն կարող էին գնահատել` որպես աջակցություն ղարաբաղյան հակամարտության կողմերից որևէ մեկին։ Ավելի ուշ հայտնի դարձավ, որ գագաթնաժողովը տեղի կունենա ապրիլի 13–ին Մոսկվայում։ ՀՀ վարչապետ Հովիկ Աբրահամյանն անընդունելի համարեց նման աշխատելաոճը։
Հայաստանն այլևս միակողմանի դաշնակից լինել չի ցանկանում>>
«Կարծում եմ, որ այդքան էլ լավ որոշում չէ զբաղեցնել նեղացած կողմի դիրքորոշում` սեփական դիրքորոշումը բացատրելու և ներկայացնելու համեմատ», – երկուշաբթի լրագրողներին ասաց Դավթյանը։
Նրա խոսքով` նման մակարդակի հանդիպումները հենց այն հարթակն է, որտեղ հարթակի մասնակիցները պետք է պատասխանեն կոնկրետ հարցերի։
Ապրիլի 1-ի լույս 2-ի գիշերը ղարաբաղաադրբեջանական շփման գծի հարավային, հարավարևելյան և հյուսիսարևելյան ուղղություններով հակառակորդը ձեռնարկել է բացահայտ հարձակվողական գործողություններ` հրետանիով, զրահապատ տրանսպորտային միջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները` հասցնելով մեծ վնասներ։–0–