Հայաստանում կինը կդատվի արտասահմանում մեկ այլ կնոջը պոռնկության մեջ ներգրավելու համար

ԵՐԵՎԱՆ, 27 սեպտեմբերի. /Նովոստի-Արմենիա/. ՀՀ քննչական կոմիտեի Հատկապես կարևոր գործերի քննության գլխավոր վարչությունում ավարտվել է շահադիտական նպատակով կնոջը պոռնկությամբ զբաղվելուն ներգրավելու և պոռնկությամբ զբաղվելուն նպաստելու դեպքերի առթիվ հարուցված քրեական գործի նախաքննությունը, հաղորդում է ՀՀ ՔԿ մամուլի ծառայությունը:

Նախնական քննության տվյալներով, Երևանի 45-ամյա բնակչուհին 2016թ. հունվարին սոցիալական կայքով հաղորդակցություն է հաստատել իր ծանոթ մի կնոջ հետ և, տեղեկանալով վերջինիս ծանր սոցիալական վիճակի մասին, առաջարկել է մեկնել Դուբայ՝ բարձր վարձատրությամբ աշխատելու։

Քննությամբ բավարար ապացույցներ են ձեռք բերվել, որ, ստանալով ծանոթի համաձայնությունը, 45-ամյա կինը, շահադիտական նպատակներով, կազմակերպել է նրա տեղափոխումը արտերկիր, որտեղ նրան ներգրավել է պոռնկությամբ զբաղվելու մեջ՝ տրամադրելով կացարան և ապահովելով հաճախորդներով, ինչի համար ստացել է միջնորդավճար:

Հաղորդագրության համաձայն, մինչ դատական վարույթում ձեռք բերված բավարար ապացույցների համակցությամբ` 45-ամյա կնոջը մեղադրանք է առաջադրվել ՀՀ ՔՕ 261-րդ հոդվածի 2-րդ մասի 3-րդ կետի (Պոռնկությամբ զբաղվելուն ներգրավելը) և 262-րդ հոդվածի 2-րդ մասի 3-րդ կետի (Պոռնկությամբ զբաղվելու համար որջեր կազմակերպելը, պահելը կամ կավատությունը) հատկանիշներով:

Քրեական գործը, մեղադրական եզրակացությամբ, ուղարկվել է Արաբկիր և Քանաքեռ-Զեյթուն վարչական շրջանների ընդհանուր իրավասության դատարան: -0-