ԵՐԵՎԱՆ, 22 նոյեմբերի./Նովոստի–Արմենիա/. Հանրային ծառայությունները կարգավորող հանձնաժողովը (ՀԾԿՀ) չորեքշաբթի նիստի ժամանակ հաստատեց «Veolia Jur» ջրամատակարարման միասնական օպերատորի («Veolia Generale des Eaux» ֆրանսիական ընկերության դուստր) ներկայացրած հայտը, որը վերաբերում է Հայաստանում ջրի սակագնի բարձրացմանը։
Ինչպես ՀԾԿՀ–ի նիստի ժամանակ նշեց կառույցի սակագնային քաղաքականության վարչության պետ Գարեգին Բաղրամյանը, «Veolia Jur» ընկերության ջրամատակարարման, ջրահեռացման և կեղտաջրերի մաքրման մանրածախ ծառայությունների սակագինը կկազմի 191,414 դրամ մեկ խմ–ի դիմաց` նախկին 180 դրամի փոխարեն (բոլոր գները ներկայացված են ներառյալ ԱԱՀ–ն)։ Այդ գումարից ջրամատակարարման սակագինը կկազմի 162,702 դրամ, իսկ ջրահեռացմանը` 28,712 դրամ։
«Ընկերության արտոնագրի համաձայն` ընկերության գործունեության երկրորդ տարում սակագները պետք է շտկվեն` կախված արժույթի փոխարժեքի փոփոխությունից, գնաճից, էլեկտրաէներգիայի սակագնի փոփոխությունից և սպառման բազիսային ծավալից, ինչը հաշվի առնելով` ընկերությունն առաջարկում էր բարձրացնել սակագինը` հասցնելով 194,3 դրամի», – ասաց Բաղրամյանը։
Загружается новость ... "Лево"
Նրա խոսքով, կարգավորիչն իրականացրել է մոնիտորինգ և պարզել է, որ սպառման բազիսային ցուցանիշը տարվա արդյունքում նվազել է 10 մլն խմ–ով և կազմել 113,1 մլն խորանարդ։
«Հաշվի առնելով ցանցի կորուստները, 2018 թ.–ին 116,2 մլն խորանարդ մետրի չափով նախատեսված սպառման բազիսային ծավալը, ինչպես նաև էլեկտրաէներգիայի սակագնի ու արժույթի փոխարժեքի փոփոխությունը` ջրի սակագինը սահմանվել է 191,4 դրամ», – ասաց Բաղրամյանը։
Հայաստանի ջրային տնտեսության պետական կոմիտեի Ջրամատակարարման և ջրահեռացման վարչության պետ Արմեն Սերգոյանն իր հերթին ընդգծեց, որ ՀՀ վարչապետի հանձնարարականի համաձայն և կարգավորիչի հետ համատեղ մշակվել են շարքային սպառողի համար սակագնի բարձրացման չեզոքացման առաջարկներ։
«Օրերս մենք համապատասխան առաջարկը կներկայացնենք կառավարության քննարկմանը, որտեղ նախատեսված կլինի, որ շարքային սպառողի համար սակագինը կմնա անփոփոխ, իսկ տարբերությունը կփոխհատուցվի վարձակալման վճարի տեսքով, որը ընկերությունը վճարում է բյուջե», – ասաց Սերգոյանը։
Միաժամանակ խմելու ջրի և ջրահեռացման մեծածախ ծառայությունների սակագինը կկազմի 57,423 դրամ խորանարդ մետրի դիմաց։ «Երևանի Կարեն Դեմիրճյանի անվան մետրոպոլիտեն» ՓԲԸ–ի ստորգետնյա ջրերի հեռացման սակագինը կազմում է 11,114 դրամ խորանարդ մետրի դիմաց։
Սակագներն ուժի մեջ են մտնում 2018 թ.–ի հունվարի 1–ից։ Միաժամանակ ընկերությունը եռամսյակը մեկ անգամ պետք է հաշվետվություն ներկայացնի սպառման ծավալների վերահսկման հարցում հայտնաբերված խախտումների մասին։
ՀՀ վարչապետ Կարեն Կարապետյանը նոյեմբերի 2–ից կայացած կառավարության նիստի ժամանակ հայտարարել է, որ ՀՀ կառավարությունը մտադիր է պահպանել ջրի գործող սակագինը 2018 թ.–ին, և սականգի բարձրացման դեպքում մտադիր է «Veolia Jur» ընկերության հետ համատեղ լուծումների գտնել մանրածախ սակագների պահպանման համար։
ՀՀ վարչապետը Ջրային տնտեսության պետական կոմիտեի նախագահին հանձնարարել է սակագների փոփոխության պարագայում քսանօրյա ժամկետում աշխատել ընկերության հետ և որոշման նախագիծ ներկայացնել սակագնի պահպանման վերաբերյալ:–0–