ԵՐԵՎԱՆ, 13 դեկտեմբերի. /Նովոստի–Արմենիա/. ՀՀ նախկին փոխվարչապետ Արմեն Գևորգյանը դատարանի նիստից առաջ լրագրողներին հայտարարեց, որ չի ընդունում իրեն առաջադրված մեղադրանքները։
Այսօր դատարանը քննում է Գևորգյանի նկատմամբ որպես խափանման միջոց կալանքը կիրառելու ՀՔԾ միջնորդությունը։
«Մինչև դատական նիստը չավարտվի, ոչինչ չեմ ասի։ Փաստաբանները նիստից հետո կներկայացնեն պարզաբանումներ», – նշեց նա։
Ավելի վաղ Գևորգյանին առաջադրվել էր մեղադրանք ՀՀ ՔՕ 332–րդ հոդվածի 2–րդ մասի հատկանիշներով (արդարադատության իրականացմանը և քննությանը խոչընդոտելը)։ Նախօրեին ՀՔԾ մամուլի քարտուղար Մարինա Օհանջյանը «Նովոստի–Արմենիա» գործակալությանը հաղորդեց, որ Գևորգյանին առաջադրված մեղադրանքների մասով լրացուցիչ տեղեկատվություն կհրապարակվի առաջիկա օրերին։
Քրեական գործ հարուցելու հիմք է հանդիսացել տեղեկատվությունն այն մասին, որ ՍԴ անդամ Վալերի Պողոսյանի վրա ճնշում է գործադրվել, որպեսզի նա որոշում ընդունի հօգուտ նախկին նախագահ Սերժ Սարգսյանի։ Պարզվել է, որ Գևորգյանը ճնշում գործադրելու փորձ է իրականացրել մեկ այլ անձի հետ միասին։
Հայկական ընդդիմությունը` առաջին նախագահ Լևոն Տեր–Պետրոսյանի գլխավորությամբ, ով առաջադրվել էր 2008 թ.–ի փետրվարի 19–ին կայացած նախագահական ընտրություններին և պարտվել էր, փետրվարի 20–ից Երևանի կենտրոնում անցկացնում էր հանրահավաքներ` դժգոհություն հայտնելով քվեարկության արդյունքներից։ Բողոքի ակցիաները 2008 թ.–ի մարտի 1–2–ը վերածվեցին անկարգությունների և իրավապահ ուժերի ու ցուցարարների միջև բախումների, ինչի հետևանքով զոհվեց 10 մարդ, ավելի քան 200–ը վիրավորվեց։ -0-