ՀՀ–ն հավանություն տվեց Ռուսաստանի հետ 100 մլն դոլարի պաշտպանական վարկի համաձայնագրին

ԵՐԵՎԱՆ, 16 նոյեմբերի. /Նովոստի–Արմենիա/. Հայաստանին տրամադրվող 100 մլն դոլարի ռուսական պաշտպանական վարկի համաձայնագրի նախագիծը վավերացման նպատակով փոխանցվել է ՀՀ Ազգային ժողով։

Համապատասխան որոշումն ընդունվել է հինգշաբթի կառավարության նիստի ժամանակ։

Ըստ փաստաթղթի` Ռուսաստանը Հայաստանին կտրամադրի պետական արտահանող վարկ ռուսական արտադրության ռազմական նշանակության արտադրանքի մատակարարման ֆինանսավորման համար։

Վարկը կտրամադրվի տարեկան 3% տոկոսադրույքով 15 տարի մարման ժամկետով (2023–2037թթ.)։ Հայաստանը վարկային միջոցներից պետք է օգտվի 2018–2022 թթ.–ին։

Համաձայնագիրը ստորագրվել է 2017 թ.–ի հոկտեմբերի 24–ին։

Կառավարության որոշման մեջ նշվում է, որ հայկական կողմը վարկն օգտագործում է հաշվարկված արտադրանքի մատակարարման վերաբերյալ պայմանագրերից յուրաքանչյուրի արժեքի մինչև 90 տոկոսի ֆինանսավորման համար։ Կանխավճարային վճարումները կազմում են յուրաքանչյուր պայմանագրի արժեքի ոչ պակաս քան 10 տոկոսը։

Փաստաթղթում նաև նշվում է, որ համաձայնագիրն ուղղված է երկու երկրների բարեկամական հարաբերությունների հետագա ամրապնդմանը։

2015 թ.–ի հունիսին ստորագրվել էր համաձայնագիր ՌԴ–ի կողմից Հայաստանին 200 մլն դոլարի պետական արտահանման վարկ տրամադրելու մասին` ռուսական արտադրության ռազմական տեխնիկայի ձեռքբերման համար։ Վարկը տրամադրվել է 13 տարով` 3 տարի արտոնյալ ժամկետով և տարեկան 3% տոկոսադրույքով։ Վարկի շրջանակում Հայաստանը ՌԴ–ից գնում է «Սմերչ» համազարկային կրակի ռեակտիվ համակարգեր և ռազմամթերք, «Իգլա–Ս» զենիթահրթիռային համալիրներ և այլ տեխնիկա։–0–