ԵՐԵՎԱՆ, 14 հուլիսի. /Նովոստի–Արմենիա/. «Նովոստի–Արմենիա» գործակալությունը ներկայացնում է չորեքշաբթի` հուլիսի 13–ի առավել ուշագրավ նորությունների սեփական տարբերակը։
• Հուլիսի 12-ի լույս 13-ի գիշերը ղարաբաղա-ադրբեջանական հակամարտ զորքերի շփման գծում հակառակորդը տարբեր տրամաչափի հրաձգային զինատեսակներից, հայ դիրքապահների ուղղությամբ արձակել է ավելի քան 250 կրակոց, իսկ հյուսիս-արևելյան (Մարտակերտ) ուղղությամբ ադրբեջանական զինուժը կիրառել է նաև 60 մմ-ոց ականանետ (2 արկ),
հայտնել է ԼՂՀ ՊՆ մամուլի ծառայությունը։ Միաժամանակ, գերատեսչությունը
հայտնել է, որ հուլիսի 13-ին ժամը 08:26-ից սկսած, ղարաբաղա-ադրբեջանական հակամարտ զորքերի շփման գծի հարավարևելյան ուղղությամբ հակառակորդը շփման գծից 30 կմ խորության վրա, անցկացնում է ուսումնամարտական թռիչքներ` ուղղաթիռների և ինքնաթիռների կիրառմամբ:
• Օդերևութաբանները
զգուշացնում են, որ Հայաստանի մարզերում և Երևանում օդի ջերմաստիճանն առաջիկա հինգ օրերին աստիճանաբար կբարձրանա 4–5 աստիճանով` հասնելով +36...+38 աստիճանի։
• ՀՀ կրթության և գիտության նախարարությունը
հայտնում է, որ 2016-2017 ուսումնական տարվա ընդունելության ցուցակները կհրապարակվեն հուլիսի 15-ին:
• Հայաստանի խմելու ջուրը միկրոկենսաբանական տեսանկյունից լիովին անվտանգ է,
հայտնել է ՀՀ ԱՆ առողջապահական պետական տեսչության հիգիենայի բաժնի պետ Մարգարիտա Բաբայանը` մեկնաբանելով բրիտանացիների կողմից կազմած` վնասակար խմելու ջուր ունեցող երկրների ցուցակը:
• «Ոսկե ծիրան» կինոփառատոնի շրջանակում տեղի ունեցավ Ջիվան Ավետիսյանի «Վերջին բնակիչը» ֆիլմի պրեմիերան։ Բացի այդ, կինոփառատոնի շրջանակում հանրաճանաչ ուկրաինացի ռեժիսոր Ռոման Բալայանն արժանացել է «Ոսկե ծիրանի» և Մայր Աթոռ Սուրբ Էջմիածնի «Եղիցի լույս» հատուկ մրցանակին: