ԵՐԵՎԱՆ, 8 դեկտեմբերի․/Նովոստի–Արմենիա/․ Գլխավոր դատախազությունը Facebook–յան իր էջում հայտարարություն է տարածել, որում նշվում է, որ պահանջում է ՀՀ ԱԺ նախկին պատգամավոր, Հայաստանի ֆուտբոլի ֆեդերացիայի նախկին նախագահ Ռուբեն Հայրապետյանից և նրա հետ փոխկապակցված 4 անձանցից (նրա ընտանիքի անդամներից) հօգուտ Հայաստանի Հանրապետության բռնագանձել՝
-
Երևան քաղաքի Ավան վարչական շրջանում գտնվող 2 բնակելի տուն, 1 ռեստորանային համալիր և 1 ոչ բնակելի տարածք, Գեղարքունիքի մարզում գտնվող 1 հողամաս, Կոտայքի մարզում գտնվող 1 հողամաս և 1 շինություն, 3 տրանսպորտային միջոց, ինչպես նաև Երևան քաղաքում գտնվող 1 բնակելի տան և 1 հողամասի միջին շուկայական արժեքները, որոնց պարզման համար նշանակվել է փորձաքննություն:
- Բռնագանձման են ենթակա 14 իրավաբանական անձանց բաժնեմասեր և բաժնետոմսեր, շուրջ 6 միլիարդ դրամի չափով փոխառությունների պահանջի իրավունք, ինչպես նաև ներդրված 3 ավանդներ՝ ընդհանուր շուրջ 11 միլիոն ՀՀ դրամի չափով:
- Բռնագանձման է ենթակա նաև շուրջ 16 միլիարդ ՀՀ դրամ՝ որպես ապօրինի եկամտի մնացորդի և օրինական եկամուտներով չհիմնավորվող բարեխիղճ երրորդ անձանց փոխանցված դրամի հանրագումար:-0-