ԵՐԵՎԱՆ, 25 նոյեմբերի. /Նովոստի–Արմենիա/. Հայաստանի Հանրապետության Ազգային անվտանգության ծառայության մարմինների կողմից իրականացված օպերատիվ քննչական աշխատանքների արդյունքում բացահայտվել է կազմակերպված հանցախումբ, որը նպատակ է հետապնդել ՀՀ տարածքում կազմակերպել մի շարք ծանր հանցագործություններ։ Այդ մասին հայտնել է գերատեսչության մամուլի կենտրոնը։
Բացահայտվել են մանրամասները, և քրեական գործ է հարուցվել
Պարզվել է, որ Երևանի նախկին բնակիչ, արտասահմանում բնակվող ՀՀ քաղաքացի, Արթուր Վարդանյանը 2015 թվականին ժամանել է Հայաստան, ստեղծել և ղեկավարել է հանցավոր խումբ:
«Նախնական համաձայնությամբ, կազմակերպված խմբի կողմից ապօրինաբար ձեռք է բերվել մեծ քանակությամբ զենք և ռազմամթերք, որը թաքցվել է Երևան քաղաքի Նորք թաղամասում՝ այդ նպատակով վարձակալած առանձնատանը»,– ասվում է ԱԱԾ հաղորդման մեջ։
Ոստիկանության հետ համատեղ խուզարկությունների ընթացքում նոյեմբերի 25–ին հայտնաբերվել են տարբեր տեսակի ինքնաձիգեր, ատրճանակներ, նռնականետեր (այդ թվում «մուխա» տեսակի), նռնակներ, պայթուցիկ նյութեր և պայթուցիկ սարքեր, կապի միջոցներ, փամփուշտներ, փամփշտակալներ, ռազմական հանդերձանք, այդ թվում` զրահաբաճկոններ:
Խուզարկության պահին առանձնատանն Արթուր Վարդանյանի գլխավորությամբ, հավաքված են եղել հանցավոր խմբակցության 9 անդամները, որոնք ձերբակալվել են:
ՀՀ ԱԱԾ քննչական վարչությունում հարուցվել է քրեական գործ ՀՀ քրեական օրենսգրքի 223-րդ հոդվածի 1-ի և 2-րդ մասերով (հանցավոր խմբավորման ստեղծում և մասնակցություն) և 235–րդ հոդվածի 3-րդ մասով (նախնական պայմանավորվածությամբ մի խումբ անձանց կողմից զենքի անօրինական ձեռքբերումը, պահումը, իրացումը, փոխադրումը կամ կրումը), կատարվում է նախաքննություն:
Մայրաքաղաքում ուժեղացվել են անվտանգության միջոցները
Հայաստանի մայրաքաղաքի կարևոր օբյեկտներում հանցավոր խմբի վնասազերծման կապակցությամբ ուժեղացված անվտանգություն է սահմանվել։
Մասնավորապես, ինչպես հայտնում է «Նովսստի–Արմենիա» գործակալության թղթակիցը, Հայաստանի նախագահի նստավայրի և Ազգային ժողովի շենքի մոտ հավաքված են եղել ուժային կառույցների` ինքնաձիգներով զինված ներկայացուցիչներ։ Ավելի ուշ պահպանությունը հանվել է։
Ահաբեկությունների պատմությունը Հայաստանում
Անկախ Հայաստանի ամբողջ պատմության ընթացքում խոշորագույն ահաբեկությունը Հայաստանի Ազգային ժողովի վրա կատարած զինված հարձակումն էր։
Այդ ժամանակ ահաբեկիչների խումբը ներխուժել էր Ազգային ժողովի նիստերի դահլիճ և գնդակահարել խորհրդարանի և հանրապետության կառավարության` այնտեղ գտնվող ղեկավարներին և անդամներին։
Ահաբեկիչների զոհ դարձան Հայաստանի վարչապետ Վազգեն Սարգսյանը, խորհրդարանի խոսնակ Կարեն Դեմիրճյանը, փոխխոսնակներ Յուրի Բախշյանը և Ռուբեն Միրոյանը, օպերատիվ հարցերի նախարար Լեոնարդ Պետրոսյանը, խորհրդարանի պատգամավորներ Արմենակ Արմենակյանը, Հենրիկ Աբրահամյանը, Միքայել Քոթանյանը։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում