Երևանի քաղաքապետը վառել է Հանրապետության հրապարակի գլխավոր տոնածառի լույսերը
![Երևանի քաղաքապետը վառել է Հանրապետության հրապարակի գլխավոր տոնածառի լույսերը Երևանի քաղաքապետը վառել է Հանրապետության հրապարակի գլխավոր տոնածառի լույսերը](/upload/iblock/022/sg6fld3oultl1az0ky2sy16ypgm4fulk.jpg)
Երևանի քաղաքապետ Տարոն Մարգարյանը երեքշաբթի երեկոյան վառել է Հանրապետության հրապարակի գլխավոր տոնածառի լույսերը:
Հանդիսավոր արարողությանը նախորդել է 3D-շոու, որի ժամանակ Հայաստանի ազգային պատկերասրահի դիմերեսին դասական երաժշտության ուղեկցությամբ սկզբից ծառեր ծաղկեցին, այնուհետև եղևնիները պատվեցին ձյունով, իսկ հետո հնչեցին զանգակներն ու հայտնվեցին տոնածառի խաղալիքները: 3D-շոուն ավարտվեց Երևանի փողոցների կադրերով:
Տոնածառի լույսերը վառելուց հետո վառվեցին Հանրապետության հրապարակի տոնական լույսերը, իսկ մայրաքաղաքի երկինքը լուսավորվեց գունագեղ հրավառությամբ:
«Այսօր հանդիսավոր կերպով վառվեցին ոչ միայն մայրաքաղաքի գլխավոր տոնածառի, այլև Երևանի 12 վարչական շրջանների տոնածառերի լույսերը», - ասել է Երևանի քաղաքապետի խորհրդական Արամ Սուքիասյանը: Նա նշել է, որ նման կերպով տրվեց տոնական միջոցառումների մեկնարկը:
Նրա խոսքերով՝ դեկտեմբերի 31-ին ժամը 22:00-ին Երևանի կենտրոնում կսկսվի ամանորյա գլխավոր միջոցառումը, որը կտևի մինչև հունվարի 1-ի գիշերվա երեքը: Մայրաքաղաքում տոնական միջոցառումներ են նախատեսվում նաև հունվարի 6-ին՝ Սուրբ Ծնունդի օրը:
Սուքիասյանը տեղեկացրել է, որ ամանորյա միջոցառումներ կկազմակերպվեն մայրաքաղաքի բոլոր վարչական շրջաններում:
Նա նաև խոստացել է անակնկալներ՝ կապված Հյուսիսային պողոտայում տոնական լուսավորության հետ: Հյուսիսային պողոտայում կկազմակերպվի նաև տոնածառերի ցուցահանդես, որոնք զարդարված կլինեն տարբեր երկրների ավանդույթներին համապատասխան:-0-