Երևանի «Փյունիկ» ակումբի մարզիչը հիասթափված է իր սաների խաղից Չեմպիոնների լիգայի շրջանակներում կայացած հանդիպման ժամանակ
ԵՐԵՎԱՆ, 13 հուլիսի. /Նովոստի-Արմենիա/. Երևանի «Փյունիկ» ֆուտբոլային ակումբի մարզիչ Վարդան Մինասյանը հայտարարել է, որ հիասթափված է իր սաների խաղից Չեմպիոնների լիգայի որակվորման երկրորդ փուլի շրջանակներում կայացած Չեխիայի «Վիկտորիա» թիմի դեմ առաջին խաղի ժամանակ:
Երևանցիները երեքշաբթի սեփական հարկի տակ 0:4 խոշոր հաշվով պարտվել են չեխերին:
«Ես շատ հիասթափված են: Անկեղծ ասած` հասկանում էի թիմի բոլոր խնդիրները, որոնք, մասնավորապես, կապված են կազմի հետ», - ասել է Մինասյանը, ով նաև Հայաստանի ազգային հավաքականի մարզիչն է:
Նրա խոսքերով՝ նա հանդիպումից առաջ տեսել է մրցակցի խաղը և գիտեր, որ դա շատ լավ թիմ է: «Սակայն այս ամենը ոչինչ չի նշանակում, քանի որ այն խաղացողները, ովքեր պետք է իրենց հետևից տանեին թիմը, խաղացին ավելի վատ, քան ավելի անփորձները», - հանդիպումից հետո կազմակերպված մամուլի ասուլիսի ժամանակ ընդգծեց Մինասյանը:
Նա նաև անդրադարձավ ակումբի երկու առանցքային խաղացողներին՝ Մարկոս Պիզելիին և Գևորգ Ղազարյանին Դոնեցկի «Մետալուրգ» ուղարկելու հետ կապված հարցին՝ նշելով, որ չի ափսոսում այդ ամենի համար:
Նա ավելացրեց, որ վերջերս տեսել է այդ ֆուտբոլիստների խաղը և հպարտ է նրանց համար:
«Այսպիսին է մեր ակումբի քաղաքականությունը, և այն կմնա անփոփոխ», - ասաց Մինասյանը:
Երևանի «Փյունիկը» բազային թիմ է Հայաստանի ազգային հավաքականի համար: Ազգային հավաքականի կազմում հանդես եկող ակումբի առավել հեռանկարային խաղացողները պարբերաբար տեղափոխվում են ավելի բարձրակարգ թիմեր:-0-