Մոտոարշավ` ջրի վրա. ավստրալացի էքստրեմալը զարմացնում և հիացնում է իր հնարքներով
ԵՐԵՎԱՆ, 4 օգոստոսի. /Նովոստի–Արմենիա/. Համացանցում անչափ տպավորիչ և սարսուռ առաջացնող կադրեր են հայտնվել. 34–ամյա ավստրալացի էքստրեմալ մրցարշավորդ Ռոբի Մեդիսոնը որոշել է զբոսնել... ալիքների վրայով։
Ինչպես գրում է Daily Mail առցանց պարբերականը, երկու տարի է պահանջվել, որպեսզի մրցարշավորդը կատարելագործի իր տեխնիկան։
«Pipe dream» (Անիրականանալի երազանք) տպավորիչ տեսանյութը մեկ օրում ավելի քան 4 մլն դիտում է ունեցել։
Մեդիսոնին հաջողվել է իր մոտոբայքով զբոսնել ջրի վրա և «ջրից չոր դուրս գալ»։ Մրցարշավորդը չի սուզվել նույնիսկ այն ժամանակ, երբ խաղաղօվկիանոսյան հսկա ալիքը ծածկել է նրան։
Տեսանյութում երևում է, որ Մեդիսոնը մի քանի այլ սերֆերների հետ մոտոցիկլետով սլանում է Թաիթի կղզու հսկայական ալիքների վրա։
Էքստրեմալի բայքն ունի հատուկ դահուկային կոնստրուկցիաներ, իսկ հետնամասում գտնվող ձևափոխված պրոյեկտորը թիավարման անվի դեր է կատարում։-0-
