Բաքվում անցկացվող Եվրոպական խաղերի շրջանակում հայ ըմբշամարտիկ Ռոման Ամոյանը կգոտեմարտի պորտուգալացի Կարվալյուի հետ

ԵՐԵՎԱՆ, 12 հունիսի. /Նովոստի–Արմենիա/. Բաքվում մեկնարկած Եվրոպական ամառային խաղերի շրջանակում հունահռոմեական ոճի ըմբշամարտիկ Ռոման Ամոյանը շաբաթ օրը կգոտեմարտի պորտուգալացի Կարվալյուի հետ, Facebook սոցցանցի իր էջում տեղեկացրել է Հայաստանի հավաքականի մամուլի քարտուղար Կարեն Գիլոյանը։

Գիլոյանի խոսքերով` հաղթանակի դեպքում Ամոյանի հաջորդ մրցակիցը կլինի Մարյանյան (Ռուսաստան) - Ֆոննեսբեկ (Նորվեգիա) զույգի հաղթողը:

Ռոման Ամոյանը Եվրոպայի կրկնակի չեմպիոն է (2006 և 2011 թթ.), աշխարհի առաջնությունների եռակի դափնեկիր։ 2008 թ.–ին Ամոյանը բրոնզե մեդալ է նվաճել մինչև 55 կգ քաշային կատեգորիայում Պեկինում կայացած օլիմպիադայի ժամանակ։ Ամոյանը սպորտի վաստակավոր վարպետ է։ Նա 2011 թ.–ին Հայաստանում ճանաչվել է լավագույն մարզիկ։

Եվրոպական առաջին օլիմպիական խաղերը, որոնք հետագայում պետք է անցկացվեն չորս տարին մեկ անգամ, անցկացվելու են Բաքվում հունիսի 12–28–ը։ Մրցումների ընթացքում կխաղարկվի 253 կոմպլեկտ մեդալ` 20 մարզաձևում, որից 11–ով կխաղարկվեն Օլիմպիական ուղեգրեր, որը տեղի կունենա 2016 թ.–ին Ռիո դե Ժանեյրոյում։

Սպասվում է, որ մրցումներին կմասնակցեն մայրցամաքի բոլոր երկրները ներկայացնող ավելի քան 6 հազար մարզիկներ։–0–