Պլատինի. Իմ այցը Հայաստան բարեկամական բնույթ է կրում

ԵՐԵՎԱՆ, 21 մայիսի. /Նովոստի–Արմենիա/. ՈՒԵՖԱ–ի նախագահ Միշել Պլատինին Երևանում կայացած ճեպազրույցում հայտնեց, որ իր այցը Հայաստան բարեկամական բնույթ է կրում, և որ «ՈՒԵՖԱ–ն որևէ խնդիր չունի Հայաստանի հետ»։

«Շատ ուրախ եմ կրկին լինել Հայաստանում։ Բուլղարիայի ճանապարհին որոշեցի այցելել Հայաստան, քանի որ վաղուց չէի հանդիպել իմ ընկեր Ռուբենի հետ (Հայաստանի ֆուտբոլի ֆեդերացիայի ղեկավար Ռուբեն Հայրապետյան)»,– ասաց Պլատինին։

Նա նշեց նաև, որ ՈՒԵՖԱ–ի ներկայացուցիչները մշտական կապեր են պահում ՀՖՖ–ի աշխատողների հետ։ 

«Մենք փորձում ենք այնպես անել, որ Արևելյան Եվրոպայում ֆուտբոլիստները կարողանան աճել։ Լավ է, որ ՈՒԵՖԱ–ն օգնում է ասոցիացիաներին ստեղծել այնպիսի դաշտեր, ինչպես Երևանի ֆուտբոլի ակադեմիայում, սակայն հիանալի կլիներ այդ դաշտերում լավ ֆուտբոլիստներ տեսնելը»,– նշեց Պլատինին։

ՈՒԵՖԱ-ի նախագահ Միշել Պլատինին հատուկ չարտերային չվերթով մեկօրյա ոչ պաշտոնական այցով ժամանել է  Երևան։  «Զվարթնոց» օդանավակայանում Միշել Պլատինիին դիմավորել է ՀՖՖ նախագահ Ռուբեն Հայրապետյանը: Մեկօրյա այցի շրջանակում ՈՒԵՖԱ–ի ղեկավարն այցելել է Մայր Աթոռ Սուրբ Էջմիածին, այնուհետև ճեպազրույց տվել հայ լրագրողներին։

Երեկոյան ՀՖՖ նախագահի անունից կմատուցվի ընթրիք:–0–