Շուշի քաղաքում տեղի է ունեցել Համահայկական 6-րդ խաղերի ջահի վառման հանդիսավոր արարողությունը

ՍՏԵՓԱՆԱԿԵՐՏ, 8 մայիսի. /Նովոստի–Արմենիա/. Արցախի Հանրապետության Նախագահ Բակո Սահակյանն ուրբաթ Շուշի քաղաքում մասնակցել է Համահայկական 6-րդ խաղերի ջահի վառման հանդիսավոր արարողությանը և հանդես եկել ողջույնի խոսքով, հայտնում է ԼՂՀ նախագահի մամուլի ծառայությունը։

Սահակյանը նշել է, որ Համահայկական խաղերի ջահի վառման հանդիսավոր արարողությունն արդեն երկրորդ անգամ է տեղի ունենում Արցախում, ինչն իր մեջ շատ խոր իմաստ է պարունակում:

Երկրի ղեկավարի բնութագրմամբ` համահայկական խաղերի յուրահատկությունն այն է, որ այստեղ պարտվողներ չկան, իսկ գրանցված հաղթանակները հաղթանակ են ողջ հայ ժողովրդի համար:

Բակո Սահակյանն ընդգծել է, որ խաղերը նաև լավ միջոց են` աշխարհին մեկ անգամ ևս ներկայանալու որպես քաղաքակիրթ, համախմբված, սեփական ուժերին ապավինող ժողովուրդ, որը, երկրագնդով մեկ սփռված լինելով հանդերձ, անխզելիորեն կապված է իր պատմական հայրենիքի հետ ու անում է հնարավորը հայոց անկախ պետականությունը հետեւողականորեն զարգացնելու եւ զորացնելու համար:

Համահայկական վեցերորդ ամառային խաղերի բացումը կկայանա 2015թ. օգոստոսի 2-ին Երևանի «Հրազդան» մարզադաշտում։

Համահայկական 6-րդ խաղերին ընդգրկվել է 17 մարզաձեւ՝ նախորդ խաղերի համեմատ 7-ով ավելի: Խաղերն անցկացվելու են Երևանում, Գյումրիում, Վանաձորում, Ստեփանակերտում, Արտաշատում, Էջմիածնում և Աբովյանում: --0—