Հայ շախմատիստները Հրանտ Մելքումյանի հաղթանակի շնորհիվ հայտնվել են երրորդ տեղում ԱԱ–ի ավարտից մեկ տուր առաջ

ԵՐԵՎԱՆ, 27 ապրիլի. /Նովոստի–Արմենիա/. Հայաստանի շախմատի հավաքականը Ծաղկաձորում անցկացվող աշխարհի առաջնության նախավերջին` ութերորդ տուրում երրորդ տեղում հայտնվեց հնդիկ Սանտոշ Վիդիտի նկատմամբ Հրանտ Մելքումյանի հաղթանակի շնորհիվ։

Ոչ–ոքի են ավարտվել հայկական և հնդկական հավաքականների միջև ութերորդ տուրի մյուս երեք պարտիաները` Լևոն Արոնյան – Պենտալա Հարիկրիշնա, Գաբրիել Սարգսյան – Սետուրաման Սետուրաման և Վլադիմիր Հակոբյան – Կրիշնան Սաշիկիրան։ Ութերորդ տուրի մյուս պարտիաների արդյունքներն են` Եգիպտոս – Ռուսաստան` 0,5-3,5 Իսրայել – Հունգարիա` 2։2, Ուկրաինա – ԱՄՆ` 1.5։2.5 և Կուբա – Չինաստան` 1։3։

Այսպիսով, առաջնության ավարտից մեկ տուր առաջ առաջին եռյակում են` Չինաստանը (13 միավոր), Ուկրաինա (11) և Հայաստան  (9). Միանգամից չորս հավաքականներ կիսում են 4-7 տեղերը (8–ական միավոր), այնուհետև Հնդկաստանն ու Կուբան են (7–ական) և մրցաշարային աղյուսակը եզրափակում է Եգիպտոսը (1 միավոր)։

Վերջին` իններորդ տուրում հայկական թիմի մրցակիցը կլինի առաջնության աութսայդերը` Եգիպտոսի թիմը, ռուսները կխաղան իսրայելացիների հետ, հունգարացիները` ուկրաինացիների, ԱՄՆ–ի թիմը կխաղա Կուբայի հետ, Չինաստանը` Հնդկաստանի։

Տղամարդկանց աշխարհի առաջնությունն անցկացվում է Ծաղկաձորում ապրիլի 19-28–ը։ -0-