ԵՐԵՎԱՆ, 15 ապրիլի. /Նովոստի–Արմենիա/. Հայաստանում տղամարդկանց աշխարհի թիմային առաջնությունն Ադրբեջանում 2016 թվականի համաշխարհային շախմատի օլիմպիադային Ռուսաստանի հավաքականի նախապատրաստման կարևոր փուլը կդառնա, «Ռ–Սպորտին» հայտնել է Մոսկվայի շախմատի ֆեդերացիայի փոխնախագահ Սերգեյ Սմագինը։
Ռուսաստանի, Ուկրաինայի, Հայաստանի, Չինաստանի, Իսրայելի, Հունգարիայի, Կուբայի, Հնդկաստանի, ԱՄՆ–ի, Եգիպտոսի հավաքականները Ծաղկաձորում ապրիլի 19-28–ին մեդալներ կխաղարկեն։ Ռուսներն աշխարհի գործող չեմպիոնն են, թիմում ընդգրկվել են Ալեքսանդր Գրիշչուկը, Սերգեյ Կարյակինը, Եվգենի Տոմաշևսկին, Դմիտրի Յակովենկոն և Նիկիտա Վիտյուգովը։
«Ռուսաստանի հավաքականը բոլոր մրցաշարերի ֆավորիտն է,– հեռախոսով ասել է Սմագինը։ – Չնայած օլիմպիադաներում ունեցած անհաջողություններին։ Դա չի ստվերում այն փաստը, որ մենք առաջվա պես, ընդհանուր առմամբ, աշխարհի ուժեղագույն հավաքականն ենք։ Բայց դա պետք է ապացուցել հաղթանակներով։ Իհարկե, չկա երաշխիք, որ մենք կհաղթենք, բայց թիմի կազմը բավականին հավասարակշռված է և մարտունակ։ Այժմ մեզ համար կարևոր է գտնել նաև օլիմպիադայի նախապատրաստական ճիշտ ուղի։ Եվ այդ մրցաշարը պետք է դիտարկել 2016 թվականի օլիմպիադայի հաղթանակի պայքարի պրիզմայով»։
Մասնագետն ընդգծել է. «Նույնիսկ եթե մենք չհաղթենք աշխարհի առաջնությունում, ոչ մի աղետ չի լինի։ Մի պայմանով, որ մենք ընթանում ենք ճիշտ ուղիով` եթե բոլոր շախմատիստները հոգեբանական և խաղային լավ վիճակում լինեն և խաղան անհատական վարկանիշի համար։ Իսկ եթե ոչ, ապա դա կլինի հերթական անհաջողությունը»։
Փորձագետի կարծիքով` ռուսների հիմնական մրցակիցը կլինի Չինաստանի հավաքականը։
«Չինացիները նախորդ տարի փայլուն հաղթանակ ունեցան և հաղթանակի հավակնորդներից են,– ընդգծեց Սմագինը։ – Նրանք հիանալի երիտասարդություն ունեն, և որոշ թոփ–խաղացողներ արդեն չեն ընդգրկվի թիմում։ Ըստ ավանդույթի` հաղթանակի համար կպայքարի Հայաստանի հավաքականը, թեև երկու տարի առաջ սկսված ճգնաժամն ակնհայտ է։ Նրանք կանեն հնարավորինը, բայց շատ բան կախված կլինի առաջնորդ Լևոն Արոնյանի խաղից։ Ուկրաինայի հավաքականը հաղթանակի մեծ ծարավ ունի և նույնպես լուրջ վտանգ կներկայացնի»,– հաղորդում է «ՌԻԱ Նովոստին»։ -0-
