ՈՒԵՖԱ–ն և Մուտկոն հերքել են Չեռնոգորիայի ֆուտբոլի հավաքականին պատժելու մասին տեղեկությունը

ԵՐԵՎԱՆ, 8 ապրիլի. /Նովոստի–Արմենիա/. ՈՒԵՖԱ–ի մամուլի ծառայությունը և ՌԴ սպորտի նախարար Վիտալի Մուտկոն հերքել են տեղեկությունն այն մասին, որ Չեռնոգորիայի ֆուտբոլի հավաքականը պատժվել է տեխնիկական պարտությամբ Ռուսաստանի հետ Եվրո–2016–ի ընտրական խաղում հանդիպման ժամանակ տեղ գտած անկարգությունների պատճառով, իսկ Ռուսաստանի հավաքականի մամուլի ծառայությունը, որը հայտնել էր տեխնիկական պարտության մասին Twitter–ի միկրոբլոգում, հեռացրել է գրառումը։

Ռուսաստանի և Չեռնոգորիայի` Պոդգորիցայում մարտի 27–ին անցկացված հանդիպումը ժամանակից շուտ դադարեցվել է երկրորդ խաղակեսին չեռնոգորցի երկրպագուների վարքի պատճառով։ Դրա հետևանքով ՈՒԵՖԱ–ն Չեռնոգորիայի ֆուտբոլային ասոցիացիայի նկատմամբ կարգապահական գործ է հարուցել։ ԶԼՄ–ներում չորեքշաբթի տեղեկություն է հայտնվել, որի համաձայն Չեռնոգորիայի հավաքականին պատժելու մասին որոշումն արդեն ընդունվել է։

«Իրականում պաշտոնական որոշում չկա, այն չի ընդունվել։ Իսկ ՈՒԵՖԱ–ի աղբյուրի տեղեկությունը սխալ է»,– ասել է Մուտկոն «Ռ–Սպորտին»։

«Ոչ մի որոշում մենք չենք կայացրել։ Այն կլինի այսօր երեկոյան կամ վաղը»,– ասել է ՈՒԵՖԱ–ի մամուլի ծառայության ներկայացուցիչը «Ռ–Սպորտին», հաղորդում է ՌԻԱ Նովոստին։ -0-