Ծագումով Սոչիից Ռուսլան Կորյանի համար Հայաստանի հավաքականում խաղալու որոշումը դյուրին էր

ԵՐԵՎԱՆ, 25 մարտի. /Նովոստի–Արմենիա/.  Ծագումով Սոչիից Ռուսլան Կորյանը, ում կանչել էին Հայաստանի ֆուտբոլի հավաքական ալբանացիների հետ արտագնա խաղին պատրաստվելու համար Եվրո-2016 առաջնության ընտրական փուլի շրջանակում, հայտնեց լրագրողներին, որ իր համար Հայաստանի հավաքականում խաղալու որոշում ընդունելը դժվար չէր։

Հայաստանի հավաքականը  մարտի 29–ին Էլբասան քաղաքում կխաղա Ալբանիայի հավաքականի հետ։ Հանդիպման նախաշեմին (մարտի 23-27) հայ ֆուտբոլիստներն ուսումնամարզական հավաք են անցկացնում Երևանի ֆուտբոլի ակադեմիայում։

«Իրականում Հայաստանի հավաքականում հանդես գալու որոշումը հեշտ տրվեց։ Երբ խաղում էի Ֆուտբոլի ազգային լիգայում (ՌԴ առաջին դիվիզիոն), երեք լեգիոների լիմիտ կար, և այդ պատճառով որոշեցի հեռանամ Ռուսաստանից, որ հայկական հավաքականում խաղալու հնարավորություն ունենամ»,– ասաց Կորյանը։

27–ամյա Ռուսլան Կորյանը տարբեր տարիների «Մորդովիայի» (Սարանսկ) և Ռոստովի ՍԿԱ–ի պաշտպան էր։ 2012 թվականի հուլիսի 3–ից պայմանագիր է ստորագրել Վլադիվոստոկի «Լուչ–Էներգիայի» հետ։ 2015 թվականի փետրվարին համալրել է Տաշքենդի «Լոկոմոտիվի» շարքերը։

Չորեքշաբթի հայկական թիմի մարզումից առաջ Հայաստանի ֆուտբոլի ֆեդերացիայի նախագահ Ռուբեն Հայրապետյանը Կորյանին և «Օլիմպիկի» պաշտպան Գաել Անդոնյանին փոխանցեց հավաքականի շապիկները «9» և «2» համարներով։

Հայկական թիմը նույն ընտրական խմբում է Դանիայի, Պորտուգալիայի, Ալբանիայի և Սերբիայի հավաքականների հետ։ Խմբի առաջատարը Դանիան է չորս հանդիպումներից հետո յոթ միավորով։ Պորտուգալական թիմն ունի վեց միավոր 3 հանդիպումից հետո։ Ալբանացիները երեք հանդիպումից հետո չորս միավոր են հավաքել։ Մրցաշարային աղյուսակը եզրափակում են Հայաստանի և Սերբիայի հավաքականները, որոնք երեք հանդիպումներից հետո ունեն մեկական միավոր։ -0-