Ֆուտբոլի կոնֆեդերացիաների 2017թ.–ի գավաթի բացման ու եզրափակիչ հանդիպումները կանցկացվեն Սանկտ Պետերբուրգում

ԵՐԵՎԱՆ, 20 մարտի. /Նովոստի–Արմենիա/. Ֆուտբոլի կոնֆեդերացիաների 2017 թ.–ի գավաթի բացման ու եզրափակիչ հանդիպումները կանցկացվեն Սանկտ Պետերբուրգում, կիսաեզրափակիչ խաղերերը` Կազանում և Սոչիում։ Մոսկվայում տեղի կունենա երրորդ տեղի համար մղվող խաղը, նշված է ՖԻՖԱ–ի մամուլի հաղորդագրության մեջ։

Մրցաշարը կանցկացվի հունիսի 17–ից հուլիսի 2–ը։ Մրցաշարի կիսաեզրափակիչ հանդիպումները տեղի կունենան հունիսի 28–ին Կազանում և հունիսի 29–ին Սոչիում։ Երրորդ տեղի համար հանդիպումը կանցկացվի հուլիսի 2–ին Մոսկվայի «Սպարտակ» մարզադաշտում, հաղորդում է ՌԻԱ Նովոստին։

Բացի Ռուսաստանի (որպես մրցաշարը հյուրընկալող երկիր) և Գերմանիայի (2014թ.–ի աշխարհի առաջնության չեմպիոն) հավաքականներից Կոնֆեդերացիաների գավաթի մրցաշարում կմասնակցեն հետևյալ մրցաշարերի հաղթողները` Եվրոպայի 2016թ.–ի առաջնություն, Ամերիկայի 2015թ.–ի գավաթ, Ասիայի 2015թ.–ի գավաթ, Աֆրիկյան ազգերի 2017թ.–ի գավաթ, Օվկիանիայի ֆուտբոլի ազգերի կոնֆեդերացիայի 2016թ.–ի գավաթ, ինչպես նաև ԱՄՆ–ի հավաքականի և ԿՈՆԿԱԿԱՖ 2015 ոսկե գավաթակրի միջև կայանալիք հանդիպման հաղթողը։ –0–