ԵՐԵՎԱՆ, 24 փետրվարի. /Նովոստի–Արմենիա/. Կրասնոդարի «Կուբան» ակումբը մինչև շաբաթվա վերջ առաջարկ կանի ֆուտբոլիստներ Վարդան Պողոսյանին և Օլեգ Շալաևին, «Р-Спорт» գործակալությանը տեղեկացրել է ակումբի գլխավոր տնօրեն Եվգենի Մուրավյովը։
«Կուբանը» մարզական հավաքների ժամանակ ուսումնասիրել է կիսապաշտպան Շալաևին և հարձակվող Պողոսյանին, ինչպես նաև կիսապաշտպան Նիկիտա Գլուշկովին, հաղորդում է «ՌԻԱ Նովոստին»։
«Մինչև շաբաթվա վերջ որոշում կկայացնենք յուրաքանչյուր խաղացողի հարցում։ Տղաները միանշանակ հեռանկարային ապագա ունեն։ Գլուշկովն արդեն պայմանագիր ունի, պարզապես առաջին թիմում չի խաղում։ Ինչ վերաբերում է Պողոսյանին և Շալաևին, կտեսնենք` ինչ կարելի է անել։ Ամեն դեպքում նրանց հետ պայմանագիր կկնքենք, սակայն առաջին թիմում դեռ չենք ներառի։ Կտեսնենք` ինչ կարելի է անել մինչև շաբաթվա վերջ։ Պայմանագրերի ստորագրումից հետո կհայտարարենք այդ մասին։ Սակայն մենք նրանց առաջարկ կանենք», – հեռախոսով ասել է Մուրավյովը։
Հայաստանի ֆուտբոլի երիտասարդական հավաքականի 22–ամյա Պողոսյանը հանդես է եկել «Ռեալ Մուրսիա» և «Սան Սեբաստիան» իսպանական ակումբներում։ 23–ամյա Շալաևը Պետերբուրգի «Սմենա» ակումբի սան է, իսկ 2013 թ.–ից հանդես է գալիս Բուլղարիայում։–0–
