ՀՀ սպորտի և երիտասարդության հարցերի նախարարը երկօրյա աշխատանքային այցով մեկնել է Ղազախստան

ԵՐԵՎԱՆ, 10 դեկտեմբերի. /Նովոստի–Արմենիա/. ՀՀ սպորտի և երիտասարդության հարցերի նախարար Գաբրիել Ղազարյանը երկօրյա աշխատանքային այցով մեկնել է Ղազախստան` մասնակցելու սպորտային բժշկության հիմնահարցերի վերաբերյալ միջազգային սեմինարի, որի թեման է «Սպորտային բժշկության զարգացման արդի հիմնախնդիրները ներկա փուլում»:

Ինչպես հայտնում է նախարարության մամուլի ծառայությունը, նախատեսվում է նախարար Ղազարյանի ողջույնի խոսքը սեմինարի մասնակիցներին, ինչպես նաև նախարարության մարզական կազմակերպությունների, սպորտային բժշկության և գիտամեթոդական աշխատանքների համակարգման բաժնի պետ Նարեկ Վանեսյանի զեկույցը «Սպորտային բժշկության հարցերը և դրանց զարգացման հեռանկարները Հայաստանի Հանրապետությունում» թեմայով:

Սեմինարի աշխատանքներին մասնակցելու են ներկայացուցիչներ Ղազախստանի Հանրապետությունից, Հայաստանի Հանրապետությունից և Ղրղըզստանից:

Գաբրիել Ղազարյանը հանդիպումներ է ունենալու Ղազախստանի սպորտային ղեկավարության հետ, որի ընթացքում քննարկվելու են ձմեռային մարզաձևերի զարգացման խնդիրները, Ղազախստանի մարզաբազաներում այդ մարզաձևերից համատեղ հավաքներ իրականացնելու հնարավոր տարբերակները, ինչպես նաև սպորտ ոլորտի հայ և ղազախ մասնագետների փորձի փոխանակման արդյունավետ ուղիներին վերաբերվող հիմնահարցերը:-0-