Հայրապետյանը Շալանդին խորհուրդ է տվել այլևս Հայաստանի հավաքական չկանչել Արտակ Դաշյանին

ԵՐԵՎԱՆ, 18 նոյեմբերի. /Նովոստի–Արմենիա/. ՀՖՖ ղեկավար Հայրապետյանը խորհուրդ տվեց հայկական հավաքականի մարզիչ Բեռնար Շալանդին այլևս թիմ չկանչել մակեդոնական «Վարդարի» կիսապաշտպան Արտակ Դաշյանին։

Հայ ֆուտբոլասերները շվեյցարացի մասնագետին քննադատել են հավաքականի խաղացողների ընդլայնված ցուցակում Դաշյանին չներառելու համար` նշելով, որ կիսապաշտպանը հաջող էր հանդես գալիս «Վարդարի» վերջին խաղերում։

«Բնականաբար ես չեմ միջամտում մարզչի աշխատանքին, բայց իմ կարծիքը, անշուշտ, կարող եմ միշտ հայտնել։ Օրինակ` խորհուրդ եմ տվել մարզչին այլևս Արտակ Դաշյանին չկանչել հայկական թիմ, քանի որ իր որակով և մարտավարական մտածողությամբ նա չի համապատասխանում Հայաստանի հավաքականի մակարդակին»,– ասաց Հայրապետյանը։

Ըստ նրա, վերջին խաղերում ունեցած անհաջողությունները հիմնականում Դաշյանի պատճառով էին։

«Մենք գոլ բաց թողեցինք Սերբիայի հետ խաղում, երբ նա փոխարինման դուրս եկավ և չփակեց իր խաղացողին։ Իսկ ֆրանսիացիների հետ խաղում նա երեսուն րոպեում ընդամենը մեկ անգամ խլեց գնդակը հակառակորդից։ Ի տարբերություն շատերի, երբ ես ֆուտբոլ եմ նայում, ես նայում եմ ոչ թե գնդակին, այլ խաղացողների գործողություններին»,– նշեց Հայրապետյանը։

Ըստ նրա, այդպիսի ֆուտբոլիստին նա, բնականաբար, թույլ չէր տա հանդես գալ Հայաստանի հավաքականում։

Հայկական խումբը Եվրո-2016-ի ընտրական փուլի խմբում ուժերը կչափի Դանիայի, Պորտուգալիայի, Ալբանիայի և Սերբիայի հավաքականների հետ: Խմբում առաջատար է Դանիայի հավաքականը, որը չորս հանդիպումից հետո վաստակել է յոթ միավոր:Պորտուգալական թիմը երեք հանդիպումից հետո ունի 6 միավոր։ Երեք խաղից հետո չորս միավոր են վաստակել ալբանացիները։ Մրցաշարային աղյուսակը եզրափակում են Հայաստանի և Սերբիայի հավաքականները, որոնք երեք հանդիպումից հետո ունեն մեկական միավոր։ -0-