Օլանդը կողմ է, որ Օլիմպիադա-2024–ն անցկացվի Փարիզում

ԵՐԵՎԱՆ, 7 նոյեմբերի. /Նովոստի–Արմենիա/. Ֆրանսիայի նախագահ Ֆրանսուա Օլանդը կարծում է, որ Փարիզը պետք է թեկնածու–քաղաք դառնա 2024 թվականի ամառային Օլիմպիական խաղերի անցկացման համար, հայտնում է ՌԻԱ Նովոստին։

«Ես կողմ եմ, որ Փարիզը, եթե նմանատիպ որոշում ընդունի, առաջադրի իր թեկնածությունը 2024 թվականի Օլիմպիական խաղերի անցկացման համար»,– ասել է Օլանդը TF1 հեռուստաալիքի եթերում։

Նա նշել է, որ Օլիմպիադայի անցկացումը կնպաստի աշխատատեղերի ստեղծմանը և դրական կազդի տնտեսության վրա։ Պետության ղեկավարի խոսքով` Ֆրանսիան նաև  կհավակնի 2025 թվականի Համաշխարհային ցուցահանդեսի անցկացմանը։

Օլիմպիադա-2024–ի անցկացման թեկնածուների դիտարկումը կսկսվի 2015 թվականին, վերջնական որոշումը կընդունվի 2017 թվականին։ 2024 թվականի Խաղերի անցկացման պոտենցիալ թեկնածուներն են` Լոս Անջելեսը, Բոստոնը, Փարիզը, Ստամբուլը, Դոհան, Դուրբանը, ինչպես նաև Բեռլինը կամ Համբուրգը։

Փարիզը 2012 թվականի ամառային օլիմպիադայի անցկացման թեկնածու քաղաք էր, սակայն քվեարկության եզրափակիչ փուլում զիջեց Լոնդոնին։ -0-