Արթուր Աբրահամը ուժերը կչափի Շտիգլից-Շտուրմ մենամարտի հաղթողի հետ

ԵՐԵՎԱՆ, 20 հոկտեմբերի. /Նովոստի-Արմենիա/. Երկրորդ միջին քաշային կարգում WBO վարկածով աշխարհի չեմպիոն Արթուր Աբրահամը նախատեսում է ուժերը չափել Ռոբերտ Շտիգլից-Ֆելիքս Շտուրմ մենամարտի հաղթողի հետ, այս մասին երկուշաբթի Երևանում տեղի ունեցած մամուլի ասուլիսի ժամանակ ասաց Աբրահամը:

Գերմիջին քաշային կարգում աշխարհի բազմակի չեմպիոն Ռոբերտ Շտիգլիցը նոյեմբերի 8-ին ուժերի կչափի միջին քաշային կարգում աշխարհի բազմակի չեմպիոն Ֆելիքս Շտուրմի հետ:

«Նախատեսում եմ մենամարտել Շտիգլից-Շտուրմ  հանդիպման հաղթողի հետ: Երբ ինձ հարցրին, թե ցանկանու՞մ եմ մենամարտել այդ հանդիպման հաղթողի հետ, ես պատասխանեցի, որ պատրաստ եմ մենամարտել երկուսի հետ», - ասաց Աբրահամը:

Նրա խոսքով՝ նա այս հարցում ոչ մի խնդիր չունի, իսկ Գերմանիայի երկրպագուները ցանկանում են տեսնել այդ մենամարտերը:

«Կարծում եմ, որ Շտիգլից-Շտուրմ հանդիպման հաղթողի հետ մենամարտին ամենաքիչը 20 հազար մարդ կգա», - ասաց Աբրահամը:

Բռնցքամարտիկի խոսքով՝ մենամարտը նախատեսվում է կազմակերպել հունվարի վերջին:

Երկրորդ միջին քաշային կարգում WBO վարկածով աշխարհի չեմպիոն 34-ամյա Արթուր Աբրահամը Քյոլն քաղաքում տեղի ունեցած իր վերջին մենամարտում մրցավարների միաձայն որոշմամբ հաղթել է 31-ամյա բրիտանացի Փոլ Սմիթ կրտսերին:

Արթուր Աբրահամը (Ավետիք Աբրահամյան) ծնվել է Հայաստանում, հանդես է գալիս Գերմանիայի դրոշի ներքո: Նա դարձել է երկրորդ միջին քաշային կարգում WBO վարկածով աշխարհի չեմպիոն՝ 2012թ.-ի օգոստոսին չեմպիոնական տիտղոսը նվաճելով Ռոբերտ Շտիգլիցից: 2013թ.-ի մարտի 23-ին Աբրահամը չկարողացավ պաշտպանել աշխարհի չեմպիոնի տիտղոսը Շտիգլիցի հետ մենամարտում: Երկրորդ ռաունդում նա վնասվածք ստացավ: Ձախ աչքն այտուցվել էր, իսկ երրորդ ռաունդից հետո այն ամբողջությամբ փակվեց: Բժիշկի հետազոտումից հետո մրցավարները որոշեցին դադարեցնել մենամարտը՝ տեխնիկական նոկաուտով հաղթանակ շնորհելով Շտիգլիցին: Սակայն 2014թ.-ի մարտին Աբրահամը վերադարձրեց տիտղոսը՝ ռևանշ-մենամարտում պարտության մատնելով Շտիգլիցին, իսկ հետո նա չեմպիոնական տիտղոսը պաշտպանեց մայիսին Մոնտենեգրոն ներկայացնող բռնցքամարտիկ Նիկոլայ Սիյեկլոչի հետ մենամարտում:

Աբրահամը 2005-2009թթ.-ին եղել է միջին քաշային կարգում IBF վարկածով աշխարհի չեմպիոնը: «Boxsport» ամսագիրը Աբրահամին ճանաչել է Գերմանիայի 2012թ.-ի լավագույն բռնցքամարտիկը: Նա հինգ անգամ (2006, 2007, 2008, 2009, 2012 թթ.) Գերմանիայի լավագույն բռնցքամարտիկ է ճանաչվել:-0-